Ang mga sumbong

Daghang mga magbabasa ning lindog ang misugyot nako kun unsay angay kong buhaton aron mas ma-appreciate sa publiko kining maong column. Apan nihukom kong isalikway ang ilang unsolicited advices -- labina ang gikan sa mga cell. nos. 0908-4287354, 0929-7741740, 0918-7326455, 0928-2792736 ug 0929-6476507 -- sa katarongan nga mas labaw kong nakasabot kay kanila sa format sa akong column. Ako goy nag-conceptualize niini.

Adunay mosumbong diri kanato nga personal ang motibo. Masabot nga gusto lang ta nilang gamiton aron pagdaot sa ngalan o kadungganan sa tawo nga kaha ilang gikaligotgotan o gikalagotan. Dili ta mosakay ning maong matang sa sumbong.

May sumbong nga lehitimo ug nagpadayag og public interest. Kining maong matang sa sumbong ang atong patolan. Apan dili maoy atong tuyo ang pagpakauwaw sa usa ka tawo kondili ang pagpalutaw sa kamatuoran maong kanunay tang nagreserba og espasyo alang sa tubag sa tawo nga gireklamo. Labina’g napatik ang reklamo nga wala makuha ang habig sa gireklamo nga parte.

Kasagaran gud, wala tay contact numbers sa mga gisumbong o gireklamo. Kun aduna man, dili sila motubag kun atong tawgan. Mora’g maglikay maong mapakyas ta pagkuha sa ilang side. Ang uban molikay pagtubag sa mga pangutana. Naa say likoy kaayo’g tubag. Ug daghan pang uban.

Apan ang ilang kapakyas o paglikay sa pagtubag sa mga pangutana dili angay himuong sukaranan aron dili ibulgar ang pasangil sa iregularidad. Maong ipatik nako ang text reklamo bisan wala makuha ang habig sa gireklamo. Pugngan ko lang ang ilang ngalan.

Dili nato bulohaton ang trabaho sa polis, sa bisan unsang law enforcement agencies ug sa ubang ahensiya sa kagamhanan busa kun makadawat ta’g sumbong nga angayan nilang atimanon, ang atong papel mao ang pag-refer dayon sa bisan unsang concern ngadto sa proper authorities.

Bakikaw sab tingali kun kita nay mobuhat sa trabaho sa proper authorities. Insulto sab tingali kini sa ilang bahin. Ang atong gimbuhaton mao ra gyud ang pag-facilitate aron makaabot ang impormasyon ngadto sa nahingtungdang mga buhatan ug ahensiya sa gobiyerno. Kini ang format ning lindog isip usa ka agony column.

(Sumbong ug reklamo? Text sa 0910-8105522)