Panghasi batok sa oposisyon
Wa ko magtuo nga bangkaruti na ang administrasyon og isyu batok sa oposisyon nga hangtud ang pagsakay ni kanhi Presidente Joseph Estrada ug Makati City Mayor Jejomar Binay sa vintage jeep nga dunay replica sa machine gun ilang daginuton.
Human makit-i sa mga opisyal sa Malakanyang ang hulagway ni Estrada ug Binay nga luwan sa vintage jeep nga gipanag-iya ni Carmen Mayor Sonia Pua hilom nilang gimando ang paggukod nila lakip na sa tag-iya sa sakyanan.
Ang hepe sa kapolisan sa nasud mimando nga imbargohon ang replica sa machine gun nga gi-mount didto sa jeep ni Pua. Si Sr. Supt. Carmelo Valmoria mimando sab sa iyang mga sakop sa Carmen pagkuha niini.
Way nahimo ang tag-iya sa replica nga nagsilbing memorabilia sa iyang bana ug nagkantidad og usa ka gatos ka libo ka pisos gawas sa pagtugyan niini. Admitido ang kapolisan nga wa sila'y kaso nga mapasaka batok sa tag-iya tungod kay ang ilang gibasihan pagsakmit niini mao lang ang usa ka letter of instruction nga nagdili sa pagbaton og mga replica sa armas.
Ang Camp Crame mimando nga imbistigahan sila si Estrada ug Binay tungod sa paggamit sa maong sakyanan diin dali sab nga gisuportahan sa Malakanyang.
Tataw nga pamolitika ug pagpanggukod ang gihimo sa Malakanyang ngadto sa mga kritiko niini. Unsa may sala ni Estrada ug Binay kun ang sakyanan nga dunay replica sa armas ang gipasakyan kanila?
Nakatay-og ba sa kahapsay ug kalinaw sa nasud ang pagsakay ni Estrada ug Binay sa maong sakyanan nga nagkinahanglan og ingon niini nga atensiyon gikan sa hepe sa kapolisan sa nasud?
Mas importante pa ba ang maong hitabo kaysa daghang mga dagkong krimin nga wa masulbad sa kapolisan? Pila ba ka mga patay ug tulis ug uban pang linuog nga krimin ang wa nila masulbad? Mas importante pa ba nga krimin ang nahimo ni Estrada ug Binay aron mao ni'y unahon sa kapolisan pag-imbistigar?
Way lalis nga gidili ang pagbaton niini, apan dependi sab siguro kun giunsa ni paggamit. Kun ang replica gigamit sa pagpanghadlok ug paghimo og krimin angayan tingali nga hatagan sa ingon niini nga atensiyon.
Kun seryoso gyud ang kapolisan sa kampanya batok sa mga replica sa armas, nganong di man ang mga namaligya og mga replica ang ilang rondahon?
Gigamit na man gani ning maong mga replica sa pagpanulis gawas sa lihitimong sports.
* * *
- Latest
- Trending
