MARSO 22, 2009: Ikalimang Domingo sa Kuwaresma
Mga Pagbasa: Jer. 31:31-34/Heb. 5:7-9/Jn. 12:20-33
Ang gugma sa Dios maoy buhing hinungdan kun nganong nisulod sa tawhanong kasaysayan ang Bugtong Anak sa Dios. Ang iyang pagsulod sa kinabuhing tawhanon maoy nakapahimo kanatong haduol ngadto sa Dios. Dugang pa niini, si Jesus nipakita na pinaagi lamang sa usa ka kamatayon nga dunay bag-ong matang sa kinabuhi nga mahimugso. Namatay siya aron kita mabuhi.Di ikalimod nga daghan kanato ang buot gayud makasinati og usa ka hinanaling resuta. Buot kita nga diha-diha dayon makasud-ong kita sa resulta sa atong hinagoan.Apan dili kini mahitabo diha-diha. Maingon nga ang usa ka lugas trigo dili dayon makahatag og bunga human sa kamatayon. Panahon karon sa kwaresma tukmang higayon sa paghinuklog sa atong kinabuhi kun maantigo ba kitang mihatag sa atong kaugalingon aron mahatagan og kinabuhi ang uban pinaagi sa atong kamatayon sa kaugalingon...?