EDITORYAL - Talamak na paglabag sa karapatang-pantao

MATINDI na ang nangyayaring paglabag sa kara­patang pantao sa bansang ito at wala namang kakayahan ang pamahalaan na panagutin ang mga umaabuso. Naipapasa-diyos na lamang ng mga kaanak ng biktima ang paglutas sa mga karumal-dumal na krimen. Paano nga’y walang maaasahan sa pamahalaan para panagutin ang mga kriminal. Ang ganitong kasamang sitwasyon sa Pilipinas ay hindi naman nakaliligtas sa paningin ng mga da­yuhang organisasyon kaya lantaran ang kanilang pagba­tikos sa pamahalaan para agad lutasin ang mga pagpatay.

Ang 2008 ang itinuturing na pinaka-madilim na taon para sa mga mamamahayag. Pitong mamama­hayag ang pinatay noong nakaraang taon at ang mga ito ay hindi pa nalulutas. Bukod sa mga mama­ma­hayag, walang awang pinapatay din ang mga pinaghihinalaang kaanib ng mga makakaliwang grupo o ang New People’s Army.

Isa sa mga hayagan kung bumatikos sa pama­halaan ay ang New York-based Committee to Protect Journalists na nagsabing ang Pilipinas ang pina­ka­delikadong bansa sa mga mamamahayag. Nagpahayag naman ang European Union Parliament ng pagkabahala sa mga hindi maipaliwanag na pagpatay sa bansa.

Ang ganitong hayagang pagbatikos ay naram­daman naman ni President Arroyo kaya naman ipinag-utos niya sa Philippine National Police na pro­tektahan ang mga journalists at seguruhin ang kaligtasan ng mamamayan laban sa mga kriminal o masasamang-loob. Wala na raw dapat political killings na mangyayari. Dapat daw maging “zero” ang political killings. Ang utos ay ginawa ng pre­sidente nang magtalumpati sa graduation ng Philip­pine National Police Academy (PNPA) kamakalawa.

Kung ganito ang gustong mangyari ni Mrs. Arroyo­, dapat pakilusin niya nang lubusan ang PNP. Lutasin ang mga pagpatay at iharap sa korte ang mga salarin. Noong nakaraang taon, sunud-sunod ang mga pagpatay pero walang nahuli para pag­bayarin sa kasalanan. Kamakailan, ginahasa at pinatay ang anak na babae ng isang NPA commander at hanggang ngayon, wala pang naaaresto sa karumal-dumal na krimen.

Kung ibig na “zero” ang political killings, pakilu­sin ang mga awtoridad para wala nang bumatikos. Tapusin ang paglabag sa karapatang pantao.