Ang Legacy ug lamppost

Gatusan ka mga planholder, depositor ug investor sa kontrobersiyal nga Legacy group ni Celso delos Angeles nagpanon sa Cebu Normal University (CNU) kagahapon atol sa usa ka forum uban ni Senador Mar Roxas.

Gipadayag nilang mga biktima sa double-your-money scheme, pre-need ug banking companies sa mayor sa Sto. Domingo, Albay ang ilang kasagmuyo sa nahidangatan sa kuwartang ilang nabubo sa mga kompaniya sa Legacy.

Kagahapon ko lang nahibaw-an nga dili lang mga Pilipino ang nabiktima sa kabuang niining delos Angeles, kay lakip sa isog kaayong misulti kagahapon sa forum uban ni Roxas ang pipila ka mga foreigner nga posibleng gidaganan usab og salapi sa mga nasiradong kompaniya ni delos Angeles.

Sa maong forum usab nako nasabtan nga sa sinudanan pa lang sa mga kompaniya ni delos Angeles aduna nay “fraud” apan samtang pagpanikas ang tumong niini, walay nahimo ang mga ahensiya sa kagamhanan pagpakgang niini.

Sa pagkadungog nako sa bagulbol sa mga biktima batok sa mga ahensiya sa kagamhanan, misangpot sa akong hunahuna ang text message nga akong nadawat makausa nga nagkanayon nga “nausab na ang meaning sa SEC” dili na Securities and Exchange Commission” tungod kay ang bag-ong meaning niini taliwala sa kontrobersiya sa Legacy mao ang SEC – Securities in Exchange of the Commission.

Imbes trabaho sa SEC ang pagprotehir sa mga pre-need planholders ug mga investors sa double-your-money scheme ni delos Angeles, tua na hinuon kini magprotehir sa tinikasang negosyo niini bugti sa mga komisyon ug mga payola gikan sa dakodako niini.

Tumong sa mga biktima ang pagpapriso ni delos Angeles. Niining puntoha, nakakuha sila og suporta gikan ni Roxas kinsa maisugon kaayong milubok ni delos Angeles atol sa mga hearing sa gihimong Senate inquiry sa isyu sa Legacy group.

Apan kun akoy pabut-on, dili lang si delos Angeles ang angay madugta sa bilanggoan. Maayong i-apil kadtong mga politiko ug mga opisyal sa mga ahensiya sa kagamhanan nga nabulahan sa pagpanikas ni delos Angeles.

* * *

Gibanhaw na usab ang kaso sa kontrobersiyal nga decorative lamppost nga maka-usa gibasura na tungod sa kakulang sa ebidensiya.

Nagduda ko nga adunay tuyo ang mga tawong nagpabanhaw niining maong isyu.

Sa bag-ong kaso, giapil ang ngalan ni Mayor Thadeo Ouano bisan sa unang kaso wala maapil iyang ngalan sa COA report nga nagsaysay sa kinatibuk-ang transaksiyon. 

Nganong iduot man ang ngalan ni Ouano?

Sa akong pagtuo, gituyo kini aron makalingkawas sa hingpit ang mga dagkong isda nga apil sa nakabahin sa komisyon niining overpriced decorative lampposts.

Maayong paninglan sa publiko ang Ombudsman nganong dili nila iduot si Secretary Hermogenes Ebdane sa Department of Public Works and Highways nga siya man ang labing taas nga opisyal nga nalambigit sa pagpamalit sa mga lampposts nga gigamit atol sa Asean summit sa Cebu.

Timan-i, ang subasta ug pagpamalit sa mga lampposts wala mahitabo dinhi sa Cebu tungod kay ang DPWH sa kauluhan maoy aktuwal nga nalambigit niini.

Ang Ombudsman ubos sa pamunoan ni Merceditas Gutierrez nga gihampak og impeachment complaint daan nang natiktikan nga pabor ngadto sa mga dagkong isda.

Mao kini ang sistema nga angayan natong pakgangon.

* * *

Nabutang na usab sa kontrobersiya si Assistant Prosecutor Mary Ann Castro human si Bureau of Immigration and Deportation acting regional director Casimiro Madarang III ug mga kawani sa BID-7 nagkahiusa aron papahawaon siya sa ilang buhatan aron pabalikon kini sa iyang orihinal nga trabaho sa National Prosecution Service.

Mao usab kini akong pangutana kang Castro. Nganong ganahan man siya sa BID-7 nga ang iyang trabaho usa man ka piskal?

Unsa may naa sa BID-7 nga ganahan man kaayo siyang mopilit sa maong ahensiya sa gobyerno?

Si Castro nag-atubang og 18 ka mga kaso sa Ombudsman gikan sa kasong conduct prejudicial to the service ngadto sa simple misconduct, immorality, bribery, conduct unbecoming a public officer, falsification of public document, perjury ug grave misconduct hangtod niadtong Hulyo 2008.

Ang Sandiganbayan Second Division padayong naminaw sa kasong bribery diin si Castro gipresentar isip witness niadtong Nobiyembre 2008.

Wala pa gani matubag ni Castro ang isyu nga giduso sa Legal Alternatives for Women Center, Inc. pinaagi ni Dolores Mapula. Si Mapula misulat ngadto sa Office of the Ombudsman aron ipangutana ang preventive suspension ni Castro.

Si Prosecution Bureau VII acting director Rodrigo Coquia mibalos sa sulat ni Mapula ug nagkanayon nga si Prosecutor Pamela Baring-Uy sa Office of the Special Prosecutor misang-at og manifestation niadtong Agosto 11, 2005 nga matud pa ang suspension order batok ni Castro i-implementar pa.

Buot ipasabot nga hangtod karon wala pa gyud diay kaserbisyohi ni Castro iyang preventive suspension?

Si Castro mibalos og kiha’g libelo kang Madarang ug ni Mactan Immigration Supervisor Fernando San Ramon niadtong miaging adlaw.

Apan kagahapon, sila na usab ni Madarang ug San Ramon ang mipasaka og kasong kalapasan sa Anti-Graft and Corrupt Practices Act, direct bribery ug extortion batok ni Castro.

Kun ako'y magbuot, dili na lang ko mamugos sa akong kaugalingon ngadto sa usa ka ahensiya nga ang tanang mga tawo kontra kaayo nako. Wala koy mahimong trabaho niana.