Illegal fishing

"Good day. Naay illegal fishing diri sa lungsod sa San Fernando. Halos kada adlaw na lang ang dynamite fishing sa kadagatan diri. Luoy kaayo ang nagtinarong nga gagmay'ng mga mananagat kay pirme walay kuha kay tugaw na kaayo ang isda. Luoy kaayo ang ilang pamilya." -- 0909-9460172

Atong sangpiton ang atensiyon sa Bantay Dagat sa paghimog pakisusi mahitungod niini. Labing maayo nga ilang ma-counter check aron pagsuta kun tinuod ba o dili nga may illegal fishing nga nahitabo sa kadagatan sa lungsod sa San Fernando.

Labing maayo sab nga maaksiyonan kini sa kagamhanang lokal sa lungsod sa San Fernando. Angay kining susihon ug kun masuta nga tinuod, kinahanglang masumpo ang mga ilegalistang mananagat.

* * *

"Good morning, Sir. Diri dapit sa Ouano wharf sa Mandaue City naay daghang mga bata nga mag-estambay labina panahon sa gabii kay mangawat og scrap iron sa barko. Kuyawan ko magtan-aw nila kay basin mapusilan sa guard. Maayo unta mahipos ni sila panahon sa kagabhion." -- 0928-4044926

Salamat sa imong pagpakabana, higalang texter. Akong sugyot nga mas maayong magpadangat ka'g kasayoran ngadto sa mga brgy. opisyal aron ila kanang maaksiyonan. Mas madali tingali ang paghatag nilag pagtagad nianang mga bataa kun ikaw mismo ang direktang mopadangat og kasayoran ngadto sa mga opisyal sa barangay.

Sa laing bahin, kun adunay proper authorities nga nakabasa ning imong text, mas maayo unta nga ila kining hatagan og igong konsiderasyon.

* * *

Nakadawat kog text agi'g reaksiyon mahitungod sa sumbong nga rampant ang sugal nga mahjong, hantak ug tong-its sa Tolotolo, partikular na sa Sitio Nangka.

Matud sa reactor, namolitika lang kuno ang nagsumbong diri nato. Gusto lang kunong daoton niini ang ilang kapitan nga last termer na.

Illogical ang iyang reaction. Unsa man ang makuha sa texter kun iyang daoton ang kapitan sa Tolotolo nga dili na man kini makalansar? Pastilan!

Ang maayong buhaton mao ang pag-adres sa isyu sa sugal. Unsa man? Tinuod ba kini o dili?

(Sumbong ug reklamo? Text sa 0910-8105522).