Kakunsabo?

Grabe na gyod kaayo ang gibuhat sa mga traysikad driver diha sa Pier area. Daghan na kaayo ang nadawat nakong reklamo mahitungod sa ilang pagpabadlong. Ang uban gidudahang kakunsabo sa mga tulisan!

Usa ka pasahero nga taga Mandaue City nga mibiyahe ngadto sa Bohol mitug-an dinhi sa Modus nga nalingla siya sa mapahimuslanong traysikad drayber diha sa Pier area. Nakabayad siyag P100 gikan sa Pier 1 hangtod sa Pier 3.

Sobra na man sab kini? Pila ba gyod diay plitehan diha sa Pier area segon sa nalatid sa taripa sa mga traysikad? Mas maayo tingaling edukahon ang publiko niini aron dili sab makapatuyang og bungat kanang mapahimuslanong mga traysikad drayber.

Duna bay city o barangay ordinance nga nagbuot kun pilay plitehan sa mga traysikad nga namasahero diha sa Pier area? Kun aduna man, nakaseguro kong dili gyod P100 ang plitehan sukad sa Pier 1 hangtod sa Pier 3, uy!

Grabe, lupig pa man nila ang taxi!

Maayo tingaling masubay ni sa proper authorities ug mapahamtangan og tukmang disiplina ang mga drayber sa traysikad nga magpatuyang lang og bungat og plite ngadto sa ilang mga pasahero.

Naa ra ba kunoy ubang traysikad driver nga masuko ug manghadlok sa mga pasahero, Pastilan!

* * *

Duna say pipila ka porters diha sa Pier 1 nga gireklamo sa usa ka pasahero dinhi sa Modus kay dako kaayo’g paningil sa dihang iyang gipabaswat sa iyang bagahe.

Sumala sa nagreklamo, gipabaswat niya ang iyang travelling bag sa porter kay may gikugos siyang bata. Gipaninglan siyag P300!

Grabeha! Dili na man tabang kanang inyong gibuhat ngadto sa mga pasahero. Nakadugang na man hinuon mo sa ilang problema ug kahasol!

Kinsa ba ang proper authorities nga makabadlong ning siaw nga mga porter?

Aksiyoni!

* * *

(Sumbong ug reklamo? Text sa 0910-8105522).