Usa na ka bulan sukad gipusil-patay ang tag-iya sa Gorordo Convenience Store nga si Lalaine Jore apan wala pa maangkon sa hingpit sa iyang pamilya ang tinuod nga hustisya.
Hangtod karon, pabiling nagkatawa ang ‘mastermind’ sa pagpusil kang Jore, samtang ang giingong sinugo nga si Technical Sgt. Filomeno Amistad nagpangagot sa iyang bag-ang sa kalagot nga ang nagsuhol niya pabiling gawasnon.
Ingon niini ang sistema sa pamolis dinhi sa nasud. Ubay-ubay nang mga kaso sa pagpamanhig nga dili gyud masulbad sa husto ang kaso.
Madakpan gani ang mamumuno ug mapasakaan og kaso, mohunong na ang imbestigasyon. Ang mastermind, ang nagsugo nga patas og tulobagon sumala sa balaod sa aktuwal nga mibuno sa mga biktima nagpabiling gawasnon.
Usa sa kaso nga gunman lang ang nadakpan mao kanang kang Jore.
Base sa nadunggan sa atong mga duwende diha sa Cebu City Police Office, nahibaw-an sa mga polis ang mastermind sa pagpusil-patay kang Jore nga giingong usa ka mayor sa usa ka lungsod sa lalawigan kang kansang bana kanhi kawani sa gobyerno nga nagnegosyo na lamang karon og importasyon.
Ang among reporter sa Banat News nagkanayon nga ang sundalong si Amistad lamang ang gipasakaan og kasong murder tungod kay matud pa wala kunoy ebidensiya nga maglambigit sa mayor sa usa ka lungsod sa habagatan nga maoy mastermind.
Nganong dili man tarungon og imbestigar?
Unsa man diay na si Amistad dili diay na makatabang og tumbok kinsay nagsugo niya?
Kun ingon niini ang sistema sa hustisya sa atong nasud, hilabihang luoya sa mga mabiktima og murder kay ang mastermind dili man gukdon sa mga polis.
Maglibog lang ta nganong dali nila mailhan ang mamumuno, apan kun pangutan-on bahin sa mastermind, mobahar. Magtuo lang hinuon ta nga nabayran.
* * *
Nahingangha ang mga Sugboanon sa report nga si Arsobispo Ricardo Cardinal Vidal maoy nangunay og hangyo kang Pres. Gloria Macapagal-Arroyo pagpabalik sa operasyon sa Sulpicio Lines.
Naluoy tingale ang Cardinal sa gisangpotang demalas sa Sulpicio karon nga gidugok sila sa mga pamilya sa mga nangamatay ug na-missing sa pagkalunod niadtong MV Princess of the Stars. Ang wala masayri sa Cardinal mao ang responsibilidad sa Sulpicio nga hangtod karon wala pa nila matubag ug ang mga gipangayo sa gobyerno, pinaagi sa Maritime Industry Authority nga mga rekisitos una pa kini makabalik sa normal nga operasyon.
Una niini mao ang ship management system (SMS). Ang Sulpicio nakigsabot sa Magsaysay Shipping aron i-review niini ang daan nga SMS sa Sulpicio, apan hangtod karon wala pa mahuman.
Ang retraining sa mga tripulante nga gimando sa Marina angay na usab niining pagasugdan.
Angay usab hingpiton sa Sulpicio ang pagbayad sa tulobagong danyos ngadto sa mga biktima sa MV Princess of the Stars nga hangtod karon igo lang ingnon nga “padayon pa sa sabotsabot sa insurers.”
Buot usab sa Marina nga kuhaon sa hingpit sa Sulpicio ang nahibiling barko nga nalunod sa kadagatan sa Romblon nga hangtod karon pabiling nagtikyaob sa nalunoran niini.
Gihimong rason sa paghangyo ni Cardinal Vidal ngadto sa presidente ang nagkabara nga kargamento tungod sa pagkahunong sa operasyon sa mga barko sa Sulpicio.
Alang kanako, maayong tumanon lang una sa Sulpicio ang gipangayong mga requirements alang sa pagpabalik sa operasyon niini. Kini gihimo sa Marina tungod ug alang sa Sulpicio ug sa mga pasahero niini.
Sa akong obserbasyon, nagpunay og pa-ubos sa presyo ang ubang mga shipping companies tungod sa pagkubos sa demand.
Tan-awa ninyo ang mga airlines companies, nagpunay lang og paubos sa presyo. Tiaw mo nang paingong Manila P688 na lang ang plete!
* * *
Malisud na nga mahiuli ang pagsalig ni Mayor Tomas Osmeña ngadto kang Bise Mayor Michael Rama karon nga nahibaw-an kini nga nakig-amiga kang Gob. Gwendolyn Garcia.
Kun tinuod ang pasangil ni Tomas nga nakig-abin si Rama kang Garcia, usa kini ka dakong salaod.
Nasayod si Rama nga wala sa maayong buot si Tomas ug Garcia tungod sa panagsumpaki sa ilang baruganan nga nagsugod sa kontrobersiyal nga Ordinance 93-1 mga nagbawi sa mga luna sa lalawigan nga anaa dinhi sa siyudad mahimutang ug ang nabaraw nga land-swap deal.
Angay hinuon magpasalamat si Rama tungod kay wala mawala sa hingpit ang pagsalig ni Tomas ngadto kaniya.
Karon nga wala nay klarong siyay standard bearer sa BOPK sa 2010, naglawig iyang ngalan sa south district hulip kang Kongresista Antonio Cuenco nga anaa na sa katapusang termino.
Sa akong nahibaw-an, daghang mga lider sa BOPK ang nangalipay nga aduna na gyuy klarong kandidato pagka-kongresista sa south district human sa ilang kalibog kinsa gyud nilang Konsehal Gerardo Carillo ug Press Secretary Cerge Remonde ang ituboy ni Tomas.
Nakadungog usab ko og estorya nga kadtong mga lider sa oposisyon mitabok og balik sa BOPK karon nga tataw na nga may kampanyahan silang klarong manok sa administrasyon.Kun mao kini ang sitwasyon, dakong gakhonon ni Jonathan Guardo ang pag-ilog sa south district.
Sa ako nang giingon sa miaging Tikdol sa Pordoy, mas dako og kahigayonan si Rama sa south district. Usa kini ka abogado ug hanas sa pamalaod ug pagpanday og balaod tungod sa taas niyang kasinatian sa konseho sa dakbayan.
Mao kini wala ni Guardo kinsa walay kasinatian sa panggobyerno unya mosungasong sa posisyon nga nagkinahanglan og kasinatian. Ang maayo niya magsugod siya og pagka-kapitan sa barangay o pagka-konsehal sa siyudad aron makasinati siya unsay panggobyerno.