Gikan sa cell. no. 0909-7277598: "Good day, Sir. Grabe na gyod ang tulis diri sa Minglanilla. Alas onse sa gabii manggawas na ang mga tulisan. Morag dili na mahadlok og polis." -- (Sent: 05:34:50 pm--October 26, 2008)
Angayang doblehon sa kapolisan sa Minglanilla ang ilang pagbantay batok ning giingong mga tulisan nga manggawas ug manghasi panahon sa kagabhion. Mas maayo kun ilang masundan kining mga tawhana ug masikop sa higayon nga masakpan sa akto nga magbuhat og krimen.
Hinuon, mas maayo gyod nga dili hatagan og higayon sa kapolisan kining maong mga tulisan nga makahigayon sa paghuygo sa paghimo og krimen.
Hinaot usab unta nga makabantay ang atong kaigsuonan niining mga tulisan nga manggawas panahon sa kagabhion!
* * *
Ang naggamit sa cell. no. 0928-6108963 mi-text nako niadtong Oktobre 21, 2008 (Sent: 04:35:41 am) aron pagpadangat sa iyang concern mahitungod sa kahuot sa trapiko diha sa Colon area, partikular na diha dapit sa Metro Colon atbang sa may Jollibee.
Sumala sa iyang sumbong, may mga PUJ nga magbiyahean sa Talisay nga mohinok og sulod nianang lugara ug gihimo na nilang terminal kanang nahisgotang dapit. Wala hinuon ibutyag sa atong texter kun unsang orasa nga mosulod diha sa Colon ang mga PUJ nga nagrota og Talisay.
"Ang Citom wala ra man nagpakabana ana," nagkanayon ang atong texter. "Nisamot na man kadaghan ang mga jeep nga biyaheg Tabunok, Talisay nga motama dihang dapita. Naa pa gyoy mga dispatser diha sa Colon nga agi-anan lang sa mga polis. Maayo ra ba kun kining maong mga dispatser manawag og pasahero. Dili ra ba gyod; Igo ra mangayog tag P5 ug kun dili mohatag ang driver manghulga sila. Mamugos gyod. Naa pay ubang dispatser nga moingon nga 'hatag na lang kun dili ka gustong dakpon sa Citom." Kay ang mga polis pod kuno nakadawat og bahin sa P5 nga ilang gipangkolekta."
Angay gyod sumpoon ang mga dispatser. Pero unsaon pagsumpo nila kun ang mga tigpatuman sa balaod nakigkunsabo nila? Pait!
Hinaot unta nga magtarong gyod sa ilang serbisyo ang mga awtoridad ug sumpoon na nila sa hingpit ang samokan nga mga dispatser.
(Sumbong ug reklamo? Text sa 0910-8105522).