"Good day, Sir. Usa ko ka trabahante kaniadto sa usa ka bakeshop nga nahimutang sa Hernan Cortes, left side kun gikan ka sa Banilad. Ni-resign ko tungod sa dili makiangayon nga pamaagi nila. Luoy intawon ang mga trabahante ini nga bakeshop labina ang mga baker kay sobra sa 14 oras ang ilang trabaho. Naay mosulod og alas dose sa tungang gabii ug mogawas alas 3 na sa hapon. Dili ra ba gyod sila hatagan og overtime pay. Wala gani silay libre kaon bisan stay in. Walay benefits. Naay mga trabahante nila nga menor de edad. Kun masakit dili dad-on sa ospital. Grabe mangasaba ang tag-iya. Labayon pa ka sa hulmahan sa pan kun masuko siya. Tag P100.00 ra ang suweldo per day. Kun naay palpak ang trabaho i-charge pa gyod ngadto sa trabahante mao ang uban wa nay makobra.'' 0920-8841984
Abusado ang employer ninyo. Nagsalig tingali kay kuwartahan man. Hinuon, may sukaranan ang iyang kasuko kun mopalpak ang trabaho sa mga trabahante pero dili maayong magpakita siya'g kabayolente.
Kabahin sa inyong suweldo ug sa tratameyinto sa inyong employer nganha ninyo, makahimo kamo pagpaabot og reklamo ngadto sa DOLE. Kay ni-resign ka na man, higalang texter, sugyoti ang imong mga kauban kanhi sa trabaho nga maghugpong sila ug maghiusa pagpadangat og reklamo ngadto sa DOLE kun gusto silang makabaton og kaangayan.
* * *
"Good AM, Sir. Grabe ang modus nianang cellshop atbang sa SM. Usa ko sa nabiktima niana. Dako kaayo ilang gi-post nga barato ang presyo sa ilang cellphone pero ang tinuod gidoble diay ang presyo. Madani sad ta magtan-aw sa cellphone pero atik ra na. Thanks." -- 0919-7645760
Daghan na ko'g nadawat nga text reklamo bahin nianang maong cellshop. Ambot kun mao ba kaha kana ang gi-raid sa mga awtoridad dili pa lang dugay. Kun mao man kana ang gi-raid, ambot og nganong nagpadayon man lang gihapon sila sa ilang tinonto.
Labing maayo tingali nga ipadayon sa proper authorities ang pagsubay ug pagpaniid sa modus operandi nianang cellshop atbang sa SM nga giingong manglingla sa mga pumapalit. Kun lig-on ang ebidensiya batok nila, angay kanselahon ang ilang business permit kun mahimo ... aron motagam!
(Sumbong ug reklamo? Text sa 0910-8105522).