Abusado si Tayor

Naay us aka dispatser nga naila lang sa ngalan nga Tayor nga, matud pa sa atong texter, abusado kaayo. Sumala sa atong tipster, anaa ang maong dispatser sa jeepney stop atbang sa Countrymall.

“Manghulga siya sa mga driver,” nagkanayon ang atong texter sa iyang text nga akong nadawat niadtong Oktober 27, 2008 gamit ang cell. no.  0906-9608662. “Unta aksiyonan ni sa mga polis sa Banilad ug dakpon ning mga dispatser diha sa Countrymall.”

Manghinaot tang maaksiyonan kini sa mga awtoridad.

* * *

“Wala lang gihapon masumpo ang sugal nga hantak diri sa Tayud. Sige man gihapon diri dapit sa Libo. Kusog ang hantak mata’g Biyernes hangtod Domingo. Dili man modakop ang mga polis sa Consolacion.” -- 0907-5237652 (Sent: 11:59:22am-- October 27, 2008

Sumala pa sa atong texter, ang hinungdan nga dili modakop ang mga polis sa sugal nga hantak diha sa Tayud mao ang“kalas.” Ambot kun unsa kini ka tinuod.

Kana ra bang hantak, ginagmay man o dinagko ang pusta, illegal gyud na busa angay kanang sumpoon. Mao nga palihog...aksiyoni!

* * *

“Duna lang koy reklamo bahin aning illegal nga panagat gamit ang dynamite diri sa brgy. Ibo ug Punta Engaño. Wala man gyud makasumpo ang mga opisyal sa barangay aning dapita. Nagmika ra sab ang mga Bantay Dagat. Siyarog di sila kadakop aning mga tawhana.” -- 0921-9531743 (Sent: 04:03:00pm -- October 27, 2008)

Angayang palamboon sa mga Bantay Dagat ang sistema sa ilang pagserbisyo aron makakita ang katawhan sa ilang “agi.”

Kun hugtan lang gyud nila sa pagbantay, dili makahigayon ang mga dinametiro sa pagpasalir sa ilang tinonto.

Molighot man gyud ning mga ilegalista kun lugak ra sab kaayo ang mga awtoridad.

* * *

 (Sumbong ug reklamo? Text sa 0910-8105522).