Patong sa load

"Hello, Sir. Naa lang koy ipaambit nimo. Bahin ni sa ubang tindahan o retailer og load sa mga cellphone. Kun magpa-load ta og P20, ang atong mabayran kay P22 man. Ila man patongan og P2. Ang uban kay dili man lagi. Makataronganon ba ning ilang gibuhat?" -- 0922-9493620 (Sent: 04:27:59pm--October 25, 2008)

Duna bitaw ubang retailer nga wala makontento sa ginansiyang gigarantiya sa telecommunications company kanila. Mao nga bisan nakaginansiya na silang daan sa P20 nga load nga ilang i-retail, mopatong pa gyod sila’g P2. Greed of great gain!

Nganong mitunhay man lagi ang ubang retailer nga wala mopatong og P2 sa ilang pagpamaligya og load? Ngano man ning ubang mga retailer nga nagpatuyang man lang sa ilang gibati?

Gibuhat sab ni sa mga barko. Kun mopalit ko’g load sulod sa barko, patungan nilag P2 ang load nga imong paliton, dako man nga kantidad o gamay. Usahay P5 gyud ang patong.

Maayo unta nga duna gyo’y mag-regulate niini aron dili magpatuyang sa pagpahimulos ang mga retailer.

* * *

Maingon-ingon ini sab ang nahitabo sa presyo sa softdrinks ug ubang mga produkto. Daghang mga tindahan nga wala motuman sa suggested retail price (SRP).

Ang mga retailer nagpatuyang sab sa pagpaburot sa ilang ginansiya. Angayan gyod unta ning subayon sa DTI.

* * *

Sa laing higayon, awhagon nako kadtong gustong mopadangat og kasayoran dinhi sa Modus nga palihog ayaw ninyo i-abbreviate ang inyong text aron masabtan kini pag-ayo.

Usahay man gud, kun magduhaduha ko pagsabot sa text, dili na lang nako mahatagan og pagtagad ang sumbong. Delikado man sab kun mosipyat ta ug mabulilyaso na hinuon, labina kun sensitibo ang kasayoran nga inyong gihatag.

Salamat sa pagsabot.

* * *

 (Sumbong ug reklamo? Text sa 0910-8105522).