Sipyat

Daw sama sa baga nga gibubo-an og bugnaw’ng tubig ang nahitabo sa pamilyang Burden dihang sukwahi sa ilang gipaabot nga paglaban ni Mayor Tomas Osmeña daw sa pagbugal-bugal ug biay-biay na hinuon ang ilang nadawat gikan sa mayor.

Ang mayor dihang gisukna labot sa kontrobersiya sa miaging Miss Cebu 2009 miingon nga iyang hatagan og pasidungog ang Miss Cebu nga si Kris Tiffany Janson tungod sa pagpakahilom niini nga matud sa mayor maoy tukmang hiyas sa usa ka tinud-anay nga beauty queen.

Si Kimberly Therese Burden duna gihapoy madawat apan matud sa mayor “Miss Cellphone” maoy iyang award nga ihatag. Bugalbugal ug pagbiay-biay maoy gasa nga gidala sa mayor inay hustisya nga maoy gisiyagit sa pamilyang Burden.

Husto ang mayor sa wa na paghatag og dakong pagtagad sa maong problema tungod kay mas daghan pang importante nga mga butang nga angayan niyang unahon pagtagad kay sa kapritso sa pipila.

Apan samtang husto siya niini, di sab makiangayon nga iyang bugal-bugalan ang pamilyang Burden. Igo na unta nga giprangkahan sa mayor ang pamilya ni Burden nga dyutay ra kaayo ang maong problema aron maoy iyang unahon sa pagtagad.

Wa na lang unta pakapini sa mayor og insulto aron malikayan nga matandog ang wa pa maalim nga samad sa garbo ug kasing-kasing sa pamilyang Burden.

Sa akong tan-aw hinuon posibling wa makatuhog ang mayor sa kinatibuk-ang sitwasyon. Kini tungod kay wa kinahanglana nga tandi-on sa mayor si Burden ug Janson.

Sukad sa sinugdanan wa man mangaway ang pamilyang Burden kang Janson busa wa kinahanglana nga motingog si Janson aron sa pagtubag. Klaro man sab sa resulta sa text votes nga si Burden gyud ang nidaug apan si Janson maoy nakabenipisyo.

Tungod niini nagduda ko nga gisugnoran ang mayor og sayop nga mga impormasyon sa mga naglagot nga sakop sa Cebu City Tourism Commission ngadto sa pamilyang Burden.

Duna sab hinuoy sayop ang pamilyang Burden sa insulto ug biay-biay nga ilang nadawat. Una mao nga nahimo nang “over kill” ang ilang kampanya kunohay alang sa hustisya ug ang pagpili og sayop nga abogado.

Nigawas man gud nga nanubra na sila sa ilang gihimo tungod kay nabulgar na man sa publiko kinsa gyuy tinud-anay nga mananaog. Gi-blacklist na sab sa commission ang personalidad nga giingong responsabli sa bulilyaso.

Unsa pa may tumong sa pamilyang Burden nga magpunay pa og saba?

Laing nakit-an nakong sipyat sa pamilyang Burden mao ang ilang pagpili og abogado. Nasayop sila og pili og abogado tungod kay ang ilang gikuha kontra man sa mayor.

Nahinumdom pa siguro mo nga ang abogado sa mga Burden nga si Atty. Alfredo Sipalay maoy nagkiha sa mayor tungod sa pagpatak-op kaniadto sa SRP.

* * *

[email protected]