Ang pagdaug sa illegal nga drugs

Sa iyang pagpakigkita ni Executive Judge Meinrado Paredes, gipanghinaot ni Chairman Vicente Sotto III sa Dangerous Drugs Board nga daghang kaso sa ginadiling drugas ang mapadaog sa gobiyerno. Apan ang tubag sa huwes, “i-train ang mga police”.

Tingale ang maong tubag ni Judge Paredes gibasi kini sa iyang kasinatian sa daghang mga tigpayuhot og ginadiling drugas nga nakalingkawas sa ilang kaso nga giatubang tungod sa kabuang sa mga police pagpanghipos og mga ebidensiya.

Tungod sa kanunay nga pagpanglaktod sa mga police pagkuha og mga ebidensiya o pagpananom og mga ebidensiya, daghang mga drug lord ang nakalusot ug nahimong gawasnon sa mga kasong ilang giatubang. Busa angayan nga i-train ang mga police unsa-on paghipos og mga ebidensiya. Apan wa ba ugod bansaya kining atong kapulisan sa pagpanghipos og mga ebidensiya? Di ba ang pagtigum ug paghipos og mga ebidensiya mao man kini ang ilang experties? Di gyod kaha kaantigo nga manghipos og ebidensiya ang atong kapulisan? Wa lang kaha sila nagpakaaron-ingnon?

Ang kampanya batok sa ginadiling drugas magmalampuson ug magmadaugon dili lamang sa pag-train sa mga police unsaon pagpanguha og mga ebidensiya nga legal ug magamit pagtaral diha sa mga hukmanan kun dili pinaagi usab sa pagpapas niadtong mga kurakot nga nakagamot na diha sa lima ka haligi sa atong kriminal justice system.

* * *

Ang kampanya batok sa ginadiling drugas kinahanglan gayod nga pahugtan tungod kay miabot na sa 7 milyones ka mga Pinoy ang mga adik dinhi sa Pilipinas sigon sa datus nga nakuha ni kongresista Tony Cuenco sa PDEA.

* * *

Ako diay nga pasalamatan sila si Sir Carling Corsiga, hepe sa Assessment; Atty. Paul Alcazaren, Deputy for operation ug Dick Cariño, chief of Staff sa Bureau of Customs Port of Cebu sa ilang pagsuporta sa anti-illegal drug seminar nga gipasiugdahan sa New Generation Against Drugs (NEWGAD) kaniadtong miaging semana.