Maayo unta'g ipadaplin na lang gyud nila for good ang Cha-cha!

Samtang daku na ang kahigayonan nga dili na mahinayon ang Cha-cha, apan matag karon ug unya, adunay motuyhakaw nga mga balita bahin niini. Sa ato pa, lagmit wa pa gyud give up totally ang mga alyado ni Gloria sa dili paghinayon sa 2010 elections aron makapadayon sila sa gahom.

Lagmit naibog sila ni Marcos kansang gahom milungtad og 20 ka tuig. Nindot gyud kaayo kun ikaw gamhanan dinhi sa atong nasud. Maoy hinungdan nga sama sa panahon ni Marcos, ang nagtungtong karon sa hilabihan nga gahom, dili na gustong pulihan.

Unta, sa demokrasya, walay maghangtud sa gahom.. Puli-puli gud. Hinoon, kun ako pa say anaa karon sa gahom, lagmit usa sad tingali ko sa dili gustong kapulihan sa gahom. Hinoon, di sad tingali ko mangitag paagi nga dili maka-eleksiyon, aron segurong di ko mapilde.

Anyway, unsa may ilang kahadlokan sa eleksiyon? Hadlok sila sa mga isyu? Hadlok sila nga sa maglakaw ang mga adlaw, magkadaghan ug magka-dagko ang mga isyu? Hadlok sila nga sa maong mga isyu, nga sagad nilang mga tubag, mao lamang ang pag-deny?

Unya, panahon ra ba sa kampanya, ukit-ukiton kita sa lungsod, ug ang pag-deny lamang lagmit dili dawaton sa mga botante. Mao ni ang ilang gikahadlokan?

Unsa may ilang kahadlokan nga lagmit usab, dili man ma-credible unya 100 percent ang oposisyon? Gani, karon, ang atong gitawag nga oposisyon, hilom man, ambut ngano! Ang nagsaba-saba karon, pulos man hinoon taga-administration!

Sa ato pa, dili maka-claim ang opposition nga ang 2010 will be an opposition year. Ilabina kun magpadayon ang ilang pagkatibulaag. Ug lagmit, gumikan sa ilang mga ambisyon, dili gyud sila ma-unite, mag-unay kini sila, magpinahitay sa isig-usa. Ug kinsa man usab ang mohiusa nila? Si Erap? I don’t think so.

Gani, si Former Governor Tingting de la Serna, nanganti nga di gyud mahitabo nga mosuportar siya'g balik ni Erap. Ug duna kahay usa kanila ni Villar, Rojas, Lacson, Binay, Legarda, Escudero, ug kinsa pa na diha, ang mo-volunteer pagpadaplin in favor ni Erap, o ni bisan kinsa ang himoong standard bearer sa oposisyon?

Busa, kun ang administrasyon maka-put up lang og walay mansa nga mga kandidato, kun mahimo dili tradpol ug dili-re-cycled, ang 2010 will be everybody’s game. Busa, let’s put on hold muna the Cha-cha ploy.