Tentasyon

MARSO 1, 2009:  Unang Domingo sa Kwaresma

Mga Pagbasa:  Gn. 9:8-15/1Pt. 3;18-22/Mk. 1:12-15

Sa daklit nga pagsaysay, si San Markos ning unang Domingo sa Kwaresma ang mipadayag nga si Jesus nagpabilin sa kamingawan sulod sa kap-atan ka mga adlaw ug didto gitintal siya sa yawa. Dugang pa, gisaysay usab ni San Markos nga human dakpa si Juan Magbubunyag si Jesus niadto sa Galilea aron isangyaw kining maong balita sa paghinulsol ug ang kahalangdon diha sa pagtuo sa Ebanghelyo.

Nahimong daw kabahin na sa atong kinabuhi ang tentasyon nga usahay lisud kaayo balibaran tungod sa gitanyag nilang kaanindot ug kalalim. Ang tawo nga walay igong disiplina sa kaugalingon ang maglisud gayud sa pagharong niini, labaw na kun siya walay igong kaikag ug kamakanunayon diha sa pag-ampo. Kun ang Anak sa Dios pagatentalon, nan samot na gyud tingali kitang mga tawo dili ba?

Apan kay tawo lamang ug makasasala, ang Dios padayon gihapong miabli sa kahigayonan aron kita matibuok pag-usab human nato masinati ang pagkabuak gumikan sa sala. Ug kini ang proseso nga gitawag og paghinulsol nga pagaubanan sa pagtuo sa ebanghelyo nga walay lain nga mao si Jesus ang nagdala og unod sa maong ebanghelyo. Pinaagi lamang sa mapaubsanong pag-angkon nga kita dautan ug nagkinahanglan sa Diosnong kaluoy kita mamahimong tinud-anay nga gawasnon gumikan sa maong gapos sa Sala. Dugang pa nahimong makahuloganon kining maong panultihona: “With thy very wounds, I will heal thee!” (cf. The Talmud). Mao kini ang hinungdan kun nganong ang Dios nga walay sala, misulod sa tawhanong kasaysayan aron pinaagi sa kahuyangan sa tawo, mabatonan niya ang kaluwasan.