“Good day. Diri sa amo sa Naga, sa may sementeryo naay video karera. Wa may aksiyon ang mga awtoridad. Hasol kaayo.” -- 0907-7515792
Labing maayo nga magpadangat mo’g impormasyon ngadto sa barangay mahitungod sa operation sa video karera diha sa inyong dapit. Mao ra bay sagad nga lusot sa mga nahingtungdang opisyal nga maong wala nila kaaksiyoni ang usa ka illegal nga kalihokan kay wala sila’y kasayoran o walay misumbong ngadto kanila mahitungod niini.
Busa pahibaloa ninyo sila. Kun dili gihapon sila moaksiyon bisan sa kasayoran nga inyong gihatod kanila, magduda na ta kun hain sila makapusta!
Mao sab ang mga polis! Pahibaloa gihapon ninyo sila mahitungod sa operation sa video karera diha sa inyong lugar aron atong masuta kun unsay lakang nga ilang himuon.
* * *
“Good day. Diha sa Pitogo, Consolacion grabe ang video karera dihang dapita. Naa ni sa likod sa BM bakeshop. Ang nagbantay mao si Jayme. Duna siya’y igsoon nga polis. Diha sad sa eskina Pitogo paingon sa Garden Bloom Village duha ka operation sa video karera diha. Duol ra baya na sa gipuy-an sa kapitan.” -- 0907-7357559
Atong sangpiton ang atensiyon sa kapolisan sa Consolacion ug ingon man ang kapitan sa barangay diin nahisakop ang dapit nga gitumbok sa atong texter diin nag-operate ang video karera sa pag-counter check sa gisumbong sa usa ka concern citizen.
Hinaot unta nga masusi kini sa tinud-anay, dili kanang pakisusi nga pa-“pogi” lang. Ug hinaot unta nga masumpo ang illegal operation sa video karera diha sa Pitogo!
* * *
Ang naggamit sa cell. no. 0919-3870260 mipadangat nako’g kasayoran nga naay napusilan (kuno) sa Tambisan, Labangon tungod sa shabu.
Basta naay shabu, motumaw sab ang lainlaing krimen. Hangtod kanus-a ba magpadayon ang pagpayuhot og shabu diha sa Tambisan? Nganong mora’g wala man gihapoy aksiyon ang mga nahingtungdan?
Aksiyoni na kini ninyo, uy! Dili man kaha mo pulpol!
(Sumbong ug reklamo? Text sa 0910-8105522).