"Naa lang koy ipahibawo dinhi sa Modus. Kanang mga driver sa taxi nga maghuwat og pasahero diha sa airport sa Mactan dagko kaayog pangayo sa pasahero. Padulong ra ko highway gikan sa airport gipangayoan ko’g plite nga P500.00. Nihatag na lang ko kay nagdali man ko. Naa kuno siya’y bahinan sa kuwarta." -- 0922-8356242
Wala koy ideya kun si kinsay "bahinan" sa taxi driver sa kuwarta nga iyang gipaningil kanimo, higalang texter, gawas sa operator sa taxi nga iyang gimaneho. Ang klaro lang mao nga binuang ang gihimo sa maong taxi driver.
Ang wala niya paggamit og meter dakong kalapasan. Maayo unta kadto kun nakuha nimo ang ngalan sa taxi, ngalan sa driver ug ang plate number niini. Angay man gud ning ireklamo ngadto sa buhatan sa LTO o ba kaha sa LTFRB. Sobra ra kamapahimuslanon ang maong taxi driver.
Awhagon ko ang atong kaigsuonan nga kun makasugat mo’g hitabo nga ingon niini -- nga dunay taxi driver nga dili mogamit sa iyang taxi meter -- sumbong dayon kamo ngadto sa proper authorities aron dili magdasa, mahigalam ug magpadayon sa pag-abuso ang badlongong taxi driver.
Gikinahanglan ang atong pagpakabana kun gusto tang masumpo ug mabadlong ang tanang badlongon sa katilingban.
* * *
"Good day nimo, Sir. Kana bitaw'ng kolektor diha sa Sto. Niño, sa sidewalk kay may pinalabi siya. Basta iyang higala dili niya kolektahan. Kusog pa gyod mangasaba kun walay ihatag." -- 0909-6272528
Unfair kini ngadto sa ubang manindahay kun tinuod man. Kun legal ang gihimo sa maong kolektor, nganong may pinalabi man? Ug nganong mangasaba man siya?
Kinsa man kining maong kolektor? Angayang ilhon kining maong kolektor aron atong masuta kun unsa gyo’y lintunganay ning tanan, labina ang mahitungod sa reklamo sa atong texter.
* * *
Hangyo lang. Kun aduna moy ipadangat nga sumbong o reklamo dinhi sa Modus, palihog ayoha’g detalye ang mga impormasyon. Mas maayo nga dili i-abbreviate ang inyong text. Daghang salamat.
* * *
(Sumbong ug reklamo? Text sa 0910-8105522).