Tulobagon sa Globe

Inay mahilom nagkadako hinuon.

Nagtuo ang kadaghanan nga mahilom na ang kontrobersiya sa Miss Cebu 2009 nga gisirad-an sa investigating panel nga gipanguluhan ni Konsehal Gerardo Carillo ang imbestigasyon.

Apil ko sa nagtuo nga mahilom na ang pamilyang Burden sa dihang gihinganlan sa investigating panel ang mga organizers sa Miss Cebu 2009 og mga “danghag” tungod sa sayop nga pag-award sa Texter’s Choice nga gidumala sa Globe Telecom.

Balikon nako, inay mahilom nagkadako hinuon.

Ang ubang kampo miingon nga angayan na lang dawaton sa pamilyang Burden ang resulta sa imbestigasyon ug pagtawag sa mga tagdumala sa beauty pageant nga mga danghag.

Naapil ko sa kampo sa mga sabaan. Moapil ko sa paglatigo sa mga tawo nga nakatampo sa paghugawhugaw sa ngalan sa Miss Cebu nga nahimo nang institusyon kang kansang kalihukan gihimo sa Sugbo matag tuig aron paghatag og dugang kolor sa selebrasyon sa Sinulog.

Si Dr. Rowena Burden matag adlaw nga nangugat tungod sa kawsa nga maangkon ang hustisya sa iyang anak nga si Kimberly Therese nga gikawatan sa kadaogan sa Texters’ Choice nga inay adto niya i-award, didto ihatag sa mananaog sa Ms. Cebu 2009 nga si Kris Tiffany Janson.

Ang akong punto nganong dili kini angay lung-an, angay limpyohan ang Miss Cebu nga nahimo na nga institusyon.

Kaniadto pa kita makadungog og mga “award-rigging” sa mga beauty pageant. Bisan sa Manila ug sa gawas sa nasud nanghitabo kini. Ma-dako o ma-gamay. Pang-baryo, pang-lungsod o pang-siyudad, aduna gyuy manggawas nga mga estorya sa tikas sa award.

Nagpasalamat gani ko nga adunay Dr. Burden nga nagpakaulaw og saba-saba sa tuyo nga malimpyo ang Cebu City Tourism Commission (CCTC) sa mga tawo nga “danghag” ug sa mga tawo nga tuyo nga naghugawhugaw sa ngalan sa institusyon.

Hatagan nato og “benefit of the doubt” ang kasamtangang mga organizers sa Miss Cebu. Pero walay nasayod kun nanghitabo na diay sa nangaging mga Miss Cebu pageant ang award rigging apan walay sama ka-isog ni Dr. Burden nga mibarog batok sa mga organizers. Pangagpas lang kining ako, apan dili imposible.

Bisan ako, dili ko moundang hangtod makabalos ko sa mga tawong nagpakaulaw. Ang balos: pagpapas sa ilang ngalan sa mga listahan sa mga organizers.

Si Jerry Yntig, opisyal sa Globe Telecom, nagkanayon sa usa ka pamantalaan nga dili angay mangayo og pasaylo ang Globe sa kontrobersiya tungod kay igo lamang kining nagsuporta nga magmalampuson ang beauty contest.

Tinuod na. Ang Globe Telecom maoy usa sa nakahatag og kolor sa kalihukan. Apan ang kalambigitan sa Globe Telecom sa kontrobersiya dili mapapas sa tumang kasayon pinaagi   lamang sa laway. Klaro ang tulobagon.

Kinsa man ang service provider diin ipadala ang mga text messages sa Texters’ Choice Award sa Miss Cebu 2009? Alang-alang man og ang Smart o Sun nga ang Globe Telecom man kaha ang misalo niini?

Si Kimberly Therese Burden nakakuha og 117,797 botos pinaagi sa text samtang si Kris Tiffany Janson, ang Miss Cebu 2009, nakakuha og 95 botos. Asa man mahibaw-i ang maong mga botos? Dili ba sa Globe Telecom kay kini man ang service provider?

Sa dihang sayop nga gianunsyo sa nag-emcee nga si Kris Tiffany Janson ang Texters’ Choice, si Yntig misaka sa stage aron paghatag sa premyo ngadto ni Janson, butang nga nakapahibulong nako kun gi-verify ba niya ang resulta nga nag-agi sa telecom nga iyang gitrabahoan kana kun wala mag-agi sa iyang mga kamot ang data. Kun na-verify, mahimo kaayo ni Yntig ang pagkuwestiyon dihadiha dayon nganong si Janson ang gi-anunsiyo nga taliwas man sa resulta.

Sumala pa sa resulta sa imbestigasyon, ang pamilyang Burden mipahibalo gilayon sa maong sayop ngadto nilang Cinbeth Orellano nga mi-refer usab sa problema ngadtong Ma. Lester “Marti” Ybañez, ngadtong Philip Rodriguez nga chairman sa Miss Cebu 2009, Bruce Bollozos ug ni acting Mayor Michael Rama.

Nasota sa imbestigasyon nga si Bollozos maoy misulti kang Marti nga ang nakadaog sa Texters’ Choice Award mao si Janson (candidate no. 12). Si Marti mihunghong usab ngadto sa akong higala nga si Vince Escario nga mao usab ang mihunghong sa program emcee nga si Janson ang mananaog.

Matud pa sa mga imbestigador: “This is the first time in the history of Miss Cebu pageant that a winner for a particular award is declared without the result coming from or certified to as correct by the official tabulator of Miss Cebu, the SGV Company.”

Tiaw mo na!

Ang Globe Telecom usa ka tinamod nga telecommunications company, apan nagpadala sa kabuang sa mga gagong organizers sa Miss Cebu 2009.

Saksi ko sa paglambo niining maong kompaniya tungod kay matag tuig ko (minus sa miaging tuig) nga nag-cover sa annual stockholders meeting niini nga himuon matag Marso o Abril. Apan naka-ako kini pag-apil sa kalihukan isip service provider sa Texters’ Choice sa Miss Cebu bisan nasayod kining walay klaro ang sistema?

Naluoy ko ni Yntig nga maoy nalat-an sa tanan. Siya pa gani ang misugyot kang Bollozos nga magbutang og system aron walay bulilyaso, apan gibalibaran lamang kini.

Apan dili karon panahon sa pagpanghunaw. Maayong atubangon niini ang responsibilidad tungod sa kapakyas ni Yntig pagkoriher sa emcee sa dihang si Janson ang gi-anunsiyong mananaog sa Globe Texters’ Choice. O ang pagkorehir dihadiha dayon sa pagkadungog niining sayop ang paghatag sa award.

Mas sayon sa mga Burden ang pagpakahilom taliwala sa isyu. Mas lisud ang ilang gihimo nga pagsabasaba.

Apan dili kini angay ihilom aron mahibaw-an sa kadaghanan ang binuang nga bisan ang bangga sa kaanyag, aduna diay gihapoy pagpanikas.

* * *

Inyong reaksiyon, ipadala sa 0915-7817491 o [email protected].