Tan-awa og bakak ba ang akong report nga gihatag sa kapolisan. Nasakmit g’yod nila ang video karera nga gibutang sa balay ni Pate Arbiol diha sa sitio Negative sa barangay Caretta.
Sayo kaayo nga nagpahibalo nako gahapon si Cebu City police direktor Patrocinio Comendador, nga nasakmit sa mga polis nga gipangulohan ni Senior Inspector David Senor ang usa ka video karera ug usa ka moli-moli gikan sa balay ni Arbiol.
Apan ang mga polis sa Carbon nga gipangulohan ni Senior Inspector Pablo Cabildo mao na lang ang wala pa kaayo molihok sa pagsakmit sa mga video karera diha sa barangay Ermita, ilabi na sa Ermita Beach ug Warwick-Barracks.
Apan bisan og nakasakmit ang mga police sa Waterfront sa video karera gikan sa balay ni Arbiol, wala gihapon ko makontinto kay may daghan pa nga video karera nga gitagoan ra diha sa Caretta.
Dili lagi mo makalimod kay daghan kaayo nga mo-report nako kabahin sa illegal nga kalihukan nga gipasagdan lang sa mga polis.
Luyo diha sa kanhi Cebu provincial jail sa M.J. Cuenco Avenue nakadawat usab ko og report sa mga video karera. Kini ra ba nga mga tig-operate og video karera sagad mangawat usab og kuryente.
Ila kining himuon kay aron dili sila madak-an sa gasto sa kuryente. Ngano gud tawon nga dili ko masuheto nga diha man ko kaniadto magpuyo sa barangay Lorega-San Miguel, nga daghan usab og video karera ug nahunong lang dihang didto pa ko.
Aw karon hinuon, bisan og wala na ko didto akong paniguroon nga maimbargo kini dayon sa kapolisan kun butangan ang maong sitio, apan dili tingali mosugot si Kapitan Fritz Herrera nga may karera sa iyang dapit.
Usbon nako, paabuton namo ni Koronel Comendador kun ang mga polis sa Carbon molihok ba batok sa video karera sa ilang dapit.
Kadtong dunay report, i-text lang nako sa 0917-383-6645.
* * *
Luoy usab no kun tangtangon lang usab dayon ang mga warden sa mga bilanggoan kun masakpan nga dunay priso nga makuhaan og shabu ug ubang matang sa illegal nga drugas.
Dili kini maayo. Pananglit og dunay gwardya nga masuko sa warden, unya butangan og shabu ang selda kun dunay mga taga DILG nga mohimo’g Oplan Greyhound, taktak dayon ang warden?
Kinsa kaha nga warden no ang molungtad? Husto si acting mayor Mike Rama nga ang maayong buhaton sa DILG mao nga mohatag sila og “full support” sa BJMP.
Himuon kini pinaagi sa paghatag og dugang infrastructure projects para prisohan ingon man pagdugang og daghang mga gwardya.
Dili makiangayon sa mga warden nga sila relibohan kay dunay nakasulod nga shabu sa gidumala nila nga prisohan nga kuwang kaayo og mga gwardya.
* * *
Natin-aw na nga gawas sa sayop nga announcement sa winner sa Globe Texter’s Choice Award, sayop pa g’yod ang gipahibalo nga premyo sa mananaug.
Matud ni acting Vice Mayor Hilario Davide III nga usa ka cellphone distributor dinhi sa dakbayan mitataw na nga ang Samsung Omnia para g’yod diay sa winner sa Miss Cebu 2009, ug ang Nokia 7310 maoy para sa Globe Texter’s Choice winner.
Buyno, parte sa awhag sa pamilya ni Kimberly Therese Burden nga taktakon pagka sakop sa City Tourism Commission si Philipp Rodriguez apil na si Bruce Bollozos, hisgotan ni sa komisyon ugma sa hapon.