Bayad sa violation

“Good day. Naa lang ko’y isumbong bahin sa enforcer sa Lapulapu City. Nadakpan ko og No Stopping. Gipangayoan man ko og P400 kay bayad kuno sa akong violation aron dili nila kuhaon ang akong license. Makataronganon ba kana?” -- 0929-3697251

Kun giisyuhan ka’g resibo o ba kaha TOP sa enforcer nga nidakop nimo ug mipabayad nimo’g P400, makaingon tang legal ug lehitimo ang iyang gihimo. Apan kun wala ka niya isyuhi’g resibo o TOP, malagmit nga nahulog sa kaugalingong bulsa sa enforcer ang imong gibayad.

Maayo unta kun nailhan pa nimo ang ngalan sa maong enforcer aron atong ikapa-counter check ang iyang binuhatan ug matino kun wala ba siya maghimo’g iregularidad sa iyang pagtuman sa iyang trabaho.

* * *

“Sir, ngano man nang mga driver og taxi nga dili man sila kontento sa meter sa ilang taxi? Semi pakyaw man ang ilang gusto. Maayo pay kuhaon na lang nang ilang meter. Kanang mga taxi nga anha sa pier, doble ang ilang pagpasakay og pasahero. Di molarga kun usa ra.” -- 0920-6928572

Labing maayo nga magpakabana mong mga pasahero. Kun makasugat mo’g taxi driver nga makigsabot ninyog semi-pakyaw, kuhaa ang plate number sa iyang taxi ug lakip ang ngalan sa driver. I-report kana ngadto sa buhatan sa LTO o ba kaha sa LTFRB.

Dako’g multa ang dili paggamit sa meter sa taxi. Illegal kana. Busa kun may taxi driver nga dili mogamit og meter, ayaw ninyo kini i-tolerate. Sumbong gyud mo ngadto sa proper authorities.

Kanang bahin sa mga taxi driver nga dili molarga kun usa ray pasahero, dugay ra kong nakadungog niana. Pananglit, gikan sa pier ug magpahatod ka sa Colon area. Mopasakay sila’g laing pasahero nga magpahatod ngadto sa uptown. Unahon ka nila’g hatod ug unya isunod ang laing pasahero.

Sa sistema sa pamasahero sa taxi, nagtuo kong dili kini maayo. Angay ning susihon sa proper authorities. Makahatag kini’g inconvenience sa pasahero nga nagdali.

* * *

(Sumbong ug reklamo? Text sa 0910-8105522).