Cellshop

"Good day, Sir. Naay cellshop diri sa Banilad nga mangilad. Naa kuno silay warranty nga one month pero inig-adto nimo way klaro. Inigpakita nimo sa resibo moingon nga dili kuno silay nag-isyu sa resibo. Bisan naa baya silay pirma." -- 0922-7542057

Ang dili nila pag-angkon sa resibo nga ilang giisyu maoy paglihay sa warranty nga ilang gitanyag ngadto sa pumapalit. Dako nang binuang ug maisip gyud nga pangilad ngadto sa kustomer.

Mas maayo tingali nga inyong i-refer kanang maong problema ngadto sa DTI. Tan-awon ta’g unsay mahimo sa maong buhatan sa tinonto sa mga negosyante nga ingon niini.

* * *

"Good PM. Sir. Kusog kaayo ang hantak diri sa Apas duol sa usa ka barber shop. Kapila na kini anhai og polis pero iniglakaw sa polis mobalik ra sab dayon." -- 0921-2997898

Unsa man lang diay gianha sa polis sa dapit diin naay hantak? Mao kahay iyang tuyo ang pagpamadlong o pagdakop sa mga sugarol? O mao ray iyang gianha ang pagkolekta’g tong?

Makapangutana man gud ta’g ingon niini kay ingon sa wala man modispanta ang mga sugarol nga nagpasiugdag hantak.

Akong sugyot mao nga isumbong ninyo ngadto sa barangay ang kalihokan sa hantak diha sa Apas, partikular na duol sa usa ka barber shop, aron masubay kana sa mga tanod.

* * *

"Kanang mga manghingiay diha sa Colon dapit sa Jollibee atbang sa Metro Gaisano wala gyu’y nakabadlong ana. Mga driver hadlok nila. Naa daw na silay padrino. Suyakan ang ligid if dili mohatag ang driver." -- 0923-3986428

Magduda gyud ta nga dunay padrino kanang mga tawhana (dispatser o manghingiay) kay wala man gyu’y nakabadlong nila.

Kadaghang law enforcer nianang lugara pero morag nagpakabuta-bungol lang. Maong kadudahan gyod.

Makapahisagmuyo! Makawagtang kini sa pagsalig sa katawhang magbubuhis ngadto sa mga awtoridad!

* * *

 (Sumbong ug reklamo? Text sa 0910-8105522).