Dagko ug makalilisang nga baha ang miigo sa daghang dapit sa nasud. Dinhi sa Sugbu ubay-ubay nang mga dagkong baha ang milampurnas sa pipila ka dapit sa kalungsoran.
Ang labing uwahing dakong baha nga nahitabo dinhi sa ato mao kadtong miigo sa pipila ka barangay didto sa Santander ug Samboan nga miresulta sa paglubong sa lapok sa mga balay.
Gipasanginlan sa mga environmentalist ang atong pagpabaya ug pagpanamastamas sa kinaiyahan nga maoy hinungdan sa mga katalagman nga nasinati sa daghang dapit sa atong nasud.
Angay’ng hatagan og seryosong pagtagad kining pamasangil sa mga eksperto sa kinaiyahan samtang wala pa moabot ang mas labing makalilisang pa nga katalagman.