Sobra kabuotan

Usahay, ang naghinobra nga kabuotan dili makaayo.

Mao unta kini ang angay isulod sa hunahuna ni Sr. Supt. Patrocinio Comendador niining iyang pagdumala isip direktor sa Cebu City Police Office.

Dili malilong namong mga sakop sa media ug sa mga kaubanang opisyal ug ginsakupan ang kabuotan ni Comendador. Ug mao kini ang hinungdan nganong daghan gihapon ang modupa niya bisan giunsa na siya og saway ni acting Mayor Michael Rama, mga komentarista sa radyo ug mga kolumnista sa pamantalaan.Nahitabo kini tungod sa dagkong mga krimen nga nanghitabo sa dakbayan sa Sugbu nga hangtod karon wala gayu'y kasulbaran.

Ang pagpatay kang Assistant City Prosecutor Patrick Ian Osorio sa Mambaling ug sa Iranian national nga si Ashkan Aminian sa Juana Osmeña Extension, Capitol Site maoy duha sa mga dagkong kaso nga wala dayon mahatagi og kasulbaran sa kapolisan sa CCPO ubos sa pamunoan ni Comendador ug maoy nakaingon sa daghang pagsaway batok kaniya.

Maayo na lang gani, ang kaso sa Iranian national medyo nahayag-hayag human nila maimbitar ang minor de edad ug maoy mihatag kanila og impormasyon kalabot sa pagpatay kang Aminian.

Sa pagsugod karon og kasulbad sa kamatayon ni Aminian, nagpabilin nga nagbitay ang kasong pagpatay ni Osorio nga hangtod karon wala gani bisan klaro na lang nga “motibo” sa krimen.

Ngano man kini?

Hangtod kanus-a man nila mahatagan og hustisya ang kamatayon sa buotan nga assistant fiscal?

Dili hinuon ko mosakay sa pagduda sa uban nga matud pa naglisud pagkuwenta ang kapolisan karon unsaon nila pagpalutaw sa mini nga kasulbaran nunot sa kalambigitan sa “underworld” sa Sugbu niining maong krimen.

* * *

Gawas sa dugay nga kasulbaran sa mga krimen, medyo mibahar karon ang kampanya sa kapolisan batok sa mga de motor nga mga kriminal hinungdan sa malampusong kalihukan sa mga tulisan ug kawatan, ilabi na sa panahon sa kagabhion.

Usahay, makatuyok man ko sa ubang mga barangay sa siyudad gawas sa atong gipuy-an nga barangay, wala na koy na-obserbahan nga checkpoints.

Hain naman diay ang mga polis, anti-crime volunteers nga hilabihang kahambugero kun makatakin na og armas, ug mga barangay tanod nga ulisi ra gyu'y gisaligan?

Kaniadto makabantay ko og subsob nga checkpoint sa dalan Imus, C. Padilla, Natalio Bacalso, habig na sa Mambaling, Juan Luna sa Mabolo. Apan karon, wala na gyu'y mabantayan nga checkpoint.

Tingale, dili nacheckpoint ang gikabisihan sa mga polis. Basin “chicks point” na. Hehehe!

Daghan naman unta kita og mga polis nga gipangdestino sa mga presinto sa kapolisan, pun-an pa sa mga batan-on nga mga sakop sa Field Training Program sa Philippine National Police. Apan nganong wala naman kitay makit-an nga mga checkpoint?

* * *

Kun unsay kabuotan ni Sr. Supt. Comendador, mao usab kabuotan si Sr. Supt. Carmelo Valmoria, ang direktor sa Cebu Provincial Police Office (CPPO).

Maayo nga pagkadumala ni Valmoria ang CPPO.

Gikan sa pagdestino sa tukma nga opisyal sa tukma nga presinto sa tukma nga panahon hangtod sa pagpatuman sa programa tumong sa kahusay ug kalinaw, natuman ni Valmoria ang iyang tahas sa probinsiya.

Apan sama sa uban nga mga opisyal sa kapolisan ug militar, si Valmoria nagkinahanglan usab unta nga motubo sa iyang ‘career’ isip sakop sa PNP.

Sumala pa nga kini si Valmoria ‘overstaying’ na isip direktor sa CPPO ug angay na gyud siya unta nga ibalhin isip promosyon tungod sa daghan nang kalampusan sa CPPO. Si Valmoria mismo ang andam nga madestino sa laing assignment.

Apan mao lagi na, unsa kabuotan si Comendador, mao usab kabuotan si Valmoria.

Bisan gusto ni Valmoria nga ma-promote, adunay mga politiko sa Sugbu nga hakog nga dili gusto nga i-share ang ‘expertise’ ni Valmoria ngadto sa ubang probinsiya o unit sa PNP.

Usa sa hugot nga mibabag sa pagbalhin ni Valmoria sa laing assignment mao mismo si Gob. Gwendolyn Garcia.

Wala mahibaw-i ang motibo ni Garcia sa iyang paggunit sa liog ni Valmoria aron magpabilin dinhi isip direktor sa kapolisan sa lalawigan.

Tingale, gigunitan ni Garcia si Valmoria tungod kay walay laing opisyal sa kapolisan nga sama ni Valmoria kabuotan nga dali lang nila nga makontrolar.

Bisan moingon si Garcia nga walay laing takus nga opisyal nga makatugbang sa ‘achievements’ ni Valmoria sa CPPO, dili gihapon kini rason nga manggunit siya og tawo nga aduna pa untay oportunidad nga ma-promote sa career nga gi-amuma niini.

Ma-dautan o ma-maayo ang tumong ni Garcia, dili gihapon maayo ang pagpugong nga motubo ug molambo ang usa ka tawo, sama sa pagpugong nga ma-promote si Valmoria.

* * *

Alang sa inyong reaksiyon, mahimo ko ninyo matawagan o ma-text sa 0915-7817491 o [email protected].