Hagit sa kapolisan

Naibog kuno si Cebu City acting mayor Michael Rama sa performance sa mga sakop sa Mandaue City Police Office tungod sa kadali lamang nilang nasulbad ang mga dagkong kaso sa pagpatay sa maong dakbayan.

Hinuon sa laing banda, may katungod usab ang acting mayor pagpagawas sa iyang gibati tungod kay sa iyang naobserbahan, ang mga kapolisan sa dakbayan sa Sugbo wala pa gihapon makasulbad sa mga nakalabay’ng dagkong pagpatay dinhi sa dakbayan.

Dili nato ikatingala nga maibog si Rama sa performance sa mga kapolisan sa dakbayan sa Mandaue. Kay kun atong itandi ang mga accomplishment tali sa Cebu City Police Office ug MCPO, dili ikalimod sa kapolisan sa dakbayan sa Sugbo nga gilupig sila sa ilang counterpart sa dakbayan sa Mandaue pagsulbad sa mga dagkong krimen sa nakalabay’ng mga adlaw.

Bisan ako makaingon nga mas agresibo ang kapolisan sa Mandaue pagsulbad sa mga linuog nga pagpatay. Kini tungod kay ilang nasulbad ang mga sunod-sunod nga mga dagkong pagpatay sa maong dakbayan.

Una ilang nasulbad ang pagpatay sa usa ka polis kinsa gibanhigan didto sa Mandaue-Mactan Bridge pipila na ka bulan ang nakalabay. Ang maong polis gibanhigan samtang nagsakay sa iyang motorsiklo human mitambong sa hearing sa usa ka kaso didto sa dakbayan sa Lapu-Lapu City.

Human niadto, nasikop usab nila dayon ang usa sa mga giingon nga suspetsado sa pagpatay sa usa ka call center supervisor sulod sa usa ka motel sa Mandaue. Hinuon, nagtingkagol na sa Mandaue City Jail ang suspetsado nga giingong kauban ra sa trabaho sa biktima.

Nasulbad usab sa kapolisan sa Mandaue ang pag-rape ug pagpatay sa usa ka trabahante sa Mactan Economic Processing Zone sa iyang ka textmate didto sa reclamation area sa maong dakbayan. Nahimong sensational ang pagpatay kang Emily Nuñeza tungod sa sirkumstansiya sa iyang gidangatan.

Nagkaila siya ug sa suspetsado, Julius Coton, pinaagi sa text dating program sa usa ka FM radio. Sa wala pa ang maong linuog nga pagpatay kang Nuñeza, nagkita na silang daan sa suspetsado hangtud nga nagka-amigohay.

Ug pipila ka adlaw human gilugos ug gipatay si Nuñeza, nadakpan dayon sa kapolisan sa Mandaue si Coton. Tuod man miadmiter si Coton nga siya ang nagpatay sa biktima, wala niya angkona ang pasangil nga iya una kining gilugos sa wala pa niya patya.

Tungod niining daling kalamposan sa kapolisan sa Mandaue pagdakop sa mga suspetsado, angay lamang usab nga pahalipayan sila tungod sa daling pagkasulbad sa maong mga kaso.

Hinuon trabaho sa kapolisan ang pagsulbad sa unsa mang krimen, dagko man og gagmay. Apan angay lamang usab silang hatagan og pahalipay sa ilang maayong performance aron sa ingon ma-encourage pa sila sa pagtuman sa ilang trabaho nga inubanan og dedikasyon.

Natural lamang nga maibog si Rama sa maayong kalamposan sa kapolisan sa silingang dakbayan. Kini gumikan kay nakita niya nga daghan sa mga sensational ug linuog nga pagpatay sa dakbayan sa Sugbo ang wala gayud masulbad sa kapolisan hangtud karon.

Hinuon dako kining hagit sa kapolisan sa dakbayan sa Sugbo aron nga mas agresibo pa sila sa ilang trabaho. Dili sa ingon nga nagmika sila sa ilang trabaho pagpatunhay sa kalinaw ug kahusay sa dakbayan nga grabe’ng namantsahan karon sa mga pagpatay ug pagpanulis.

Dili usab kalikayan nga ingon niini ang impresyon ni Rama sa performance sa kapolisan sa dakbayan sa Sugbo. Kini gumikan lagi sa kahinay sa dagan sa ilang imbestigasyon sa kaso sa mga linuog nga pagpatay sa dakbayan.

Bisan pa ang publiko nakamatikod niini. Ug dili na ikatingala kun ilang batikoson ang kapolisan tungod sa ilang ka palpak usahay pagmintenar sa kahusay ug kalinaw sa dakbayan.

Bitaw, kun gusto ang kapolisan nga mas motaas pa ang paglantaw sa publiko ug mga opisyal sa dakbayan, angay lamang siguro nga pakusgan pa nila ang ilang mga gimbuhaton pagsulbad sa mga linuog nga pagpatay sa dakbayan.

* * *

Email: [email protected]