VK operation imonitor na

Kining mga tulisan nga siaw kaayong manulis ug usahay mamusil pa gani sa ilang biktima, kanus-a pa kaha kini maswertehe nga ang ilang tulison dunay armas.

Mahitabo gani kini kusog g’yod kaayo ang akong bahakhak sa pagkatawa kay nakabawos na kadtong mga biktima sa tulis.

Tambag lang hinuon nako nga kadtong magdala og armas, kinahanglang lisensyado lang usab.

Dili angay’ng kaloy-on kining maong matang sa mga tawo nga gawas nga manulis, mamusil pa g’yod.

* * *

Bantayan na sa City Hall ang kampanya sa kapolisan batok sa illegal nga sugal, ilabi na ang video karera.

Gitug-anan ko ni acting Cebu City Mayor Hilario Davide III nga gimandoan niya si Koronel Patrocinio Comendador nga mosumiter og sinemana nga report sa City Hall sa ilang kalampusan.

Ang kapolisan mireport nga usa ra ka video karera ang ilang nasakmit sa karong semana, ug unom sa miaging semana.

Angay’ng mahibaw-an nga ang lima nga nasakmit sa miaging semana nahimo diha nga gipahibalo nako ni Comendador nga mibalik ang video karera operation sa barangay Kamagayan.

Kun wala pa kita moreklamo, wala g’yod aksyoni sa mga polis ang video karera sa Kamagayan. Tan-awa, bisan gi-expose na nato dinhi sa atong kulum, apan walay gihimo ang kapolisan.

Mitambag si Vice Mayor Davide nga dili na lang nato ipublikar dinhi ang balay sa nahimutangan sa video karera kay matud niya dali-dalion man og balhin ug maglisud na nuon kuno ang kapolisan pagsakmit.

Aw kana hinuon nga rason layo ra sa tinuod. Ang tinuod nga nasayod ang mga polis, ilabi na ang mga barangay opisyal kun hain ang mga video karera ipamutang, apan wala lang magtagad.

Nalipay ko kay daghan ang mihatag kanato og inpormasyon nga gipadala pinaagi sa text message. Kadtong uban nga dunay inpormasyon ipadala sa 0917-383-6645.

Panid-an nato kun karong semanaha motinuod na ba ang kapolisan sa ilang kampanya. Nahukman sa Police Coordinating and Advisory Council nga dili usa sila magmugna og task force.

Hatagan nila og higayon ang mga station commanders sa lainlaing police station nga maoy maninguha pagsakmit sa mga illegal nga kalihukan.

* * *

Usa ka higala nako sa City Hall, mitug-an nga wala g’yod lagi mahunong ang masiao operations dinhi sa Sugbo ug ubang bahin sa Kabisay-an.

Tulo diay ka lainlaing resulta ang mogawas. Duna kuno’y giingon nga Australia ug unsa pa kadto. Taga Pasil ang usa sa mga financier sa masiao, samtang usa ka iladong tawo sa Sugbo ug higala sa mayor ang usa. Wala na ko tug-ani sa ikatulo.

Giingnan lang ko sa akong higala nga nagtrabaho sa City Hall kun wala ba diay kuno mahibalo ang kapolisan ani? Dayon, makantalitahon kaayong katawa.

Sa kalungsuran lagi, kusog pa kaayo ang masiao. Ang akong manghud god nga tua sa amihanang Sugbo gitambagan na nako nga dili g’yod magpakabuang niining maong pagpangilad.

Aw duna man sa’y padag-on nila hinuon apan kadtong gamay ra og pusta. Nagpasabot nga kwentahon nila kun hain kadtong numero nga gamay ra sila og mabayran maoy padag-on.

* * *

Sige, usbon nako, kadtong dunay mga report kabahin sa masiao, video karera ug uban pang mga illegal nga kalihukan, ilabi na shabu, i-text lang sa 0917-383-6645. Usahay lang dili na ko motubag kay sa kadaghang mo-text mahutdan tawon ko sa load.

Gawas lang adtong duna koy buot pa pakisayran nga mangutana ko og dugang.