Ang naggamit sa cell. no. 0922-3651078 mipadangat kanako’g kasayoran nga nagkanayon: “Good PM. Naay internet diri sa Zone Papaya, brgy. Ibabao, Mandaue City atbang sa bag-o nga school. Magpasalida ang mga bata og bold movies bisan unsang orasa kay hulgan ra man og tag P1.00. Gibutang ra ni daplin sa karsada. Ubay-ubay ra ba ang mga computer.”
Labing maayong susihon sa mga opisyal sa brgy. Ibabao, Mandaue City kining gitaho sa atong texter. Mas maayong palihokon nila ang ilang mga tanod aron pagsuta kun unsa kini ka tinuod.
Unsa ba ning klaseha sa tinonto (kun tinuod man) nga hulgan ra man og sensilyo ang computer ug mopasalida nag bold movies? Duna na ba diay kahimanan nga ingon niini karon? Angay ning sutaon!
Aksiyoni!
* * *
“Good day, Sir. Usa ko sa daghang magbabasa sa imong mga lindog. Naa lang koy reklamo. Naunsa man ning mga guwardiya sa LTO nga mag-fixer na man sad? Nadakpan ko niadtong usang semana. Na-TOP akong lisensiya. Akong giadto sa LTO ug nangutana ko sa guwardiya kun asa ko puydeng moduol aron akong makuha ang akong lisensiya. Niingon man ang guwardiya nga siya lang kunoy mokuha sa akong lisensiya ug adto lang kuno nako ihatag niya ang bayad kay kun ako kunoy mokuha naa pay seminar. Siya lang kuno aron madali. Daghan na gyung fixer sa LTO.” -- 0920-7122194 (Sent: 02:30”03pm -- November 7, 2008)
Una sa tanan, akong awhagon ang tanan natong kaigsuonan nga mopahigayon og transaksiyon sa LTO nga ayaw gyud mo paggamit sa serbisyo sa mga fixer. Bahala na’g dugay mahuman basta kay seguro. Kun mogamit ka god sa mga fixer, gawas nga bunalan ka’g dinagkong balayranan, posible pa nga mailad ka nila.
Ikaduha, angay unta nga pahugtan sa LTO ang ilang mga sumbanan. Dili unta nila angay dawaton ang mga transaksiyon nga gipaagi og fixer. Ug kun tinuod nga naay mga guwardiya diha sa LTO nga nag-sideline isip fixer, dili angay i-tolerate ang gibuhat sa maong guwardiya.
Walay mag-fixer kun walay modawat o mo-honor sa mga transaksiyon nga gipaagi kanila. Busa, anaa ra gyud sa taga LTO ang hingpit nga kasulbaran bahin sa kalihokan sa mga fixer.
* * *
(Sumbong ug reklamo? Text sa 0910-8105522).