Task Force VK

Gisuportahan nako ang sugyot sa ubang kapolisan nga mas labing maayo nga mugnaon pagbalik ang usa ka task force nga tahasan aron paghimo og paspas nga kampanya sa illegal nga sugal.

Ila kining sugyot tungod kay ang ubang mga polis diha sa lainlaing police stations, sama sa Pardo police station, Parian police station, San Nicolas police station ug Carbon police station wala man kaayo molihok.

Wala malilong nga mibalik na pagsiaw ang video karera operation sa tagsa-tagsa nila ka hurisdiksyon, apan ang mga polis ilabi na ang mga hepe sa kapolisan nagpakabuta-bungol man lang.

Ang kadagkoan sa City Hall mipasalig nga tun-an nila ang sugyot aron imando ngadto ni Cebu City police direktor Patrocinio Comendador kun makita nga angay g’yod nga mugnaon ang task force.

Ubos god sa balaud nga gilatid sa Republic Act 6975 nga giamendar sa Republic Act 8551, ang mga local government officials maoy gihatagan og gahum sa pagsuperbisar sa kampanya sa illegal nga sugal sa ilang lugar.

Gipasaligan ko ni acting Vice Mayor Hilario Davide III nga maoy nagsilbi karon nga tsirman sa Police Coordinating and Advisory Council nga hisgutan nila ang pagmugna og task force Karera.

Ang ako god nga mga inpormers, mitug-an nga wala man aksyoni sa kapolisan ang ilang gireport. Sama diha sa Tabucanal, Pardo nga gibutang sa balay ni Daniel gitagoan ra kuno.

Husto baya sab hinuon ang sugyot nga dili maayong ipatik nato ang balay nga gibutangan sa video karera kay dali-dalion ra kuno’g tago ug balhinon sa laing balay.

Mao nga miundang ko pagpatik ug gidiritso na lang nako paghatag sa kapolisan.

Mipasalig si Koronel Comendador nga i-require niya ang mga hepe sa lainlaing police stations nga mosumiter og weekly report sa ilang kampanya batok sa illegal nga sugal, ilabi na ang video karera.

Nindot usab nga paagi. Unya alang ni acting mayor Michael Rama ug Koronel Comendador, kadtong mga hepe sa mga police stations nga walay maayong kalampusan sa pagsakmit sa video karera, ilisan.

Bisan si mayor Rama mitug-an nako nga dunay mga hepe sa kapolisan dinhi sa dakbayan nga natan-aw niya nga dili haum sa ilang pwesto, apan gihatagan lang niya’g higayon nga iprobar nga sayop ang iyang pagtoo.

Buyno, kadtong mga informer nako nga nadismaya sa walay aksyon sa kapolisan sa inyong reklamo, huwata lang ang ilang aksyon.

Ayaw hunonga ang inyong mga report. I-text lang sa 0917-383-6645, ug mahimo usab nga inyong suwaton ug butangan og sketch kay gawas nga ihatag nato sa kapolisan, itugyan nato sa NBI.

Si Mayor Tomas Osmeña nga tua karon sa Houston, Texas miingon nga usahay mas mosalig siya sa NBI mao nga kaniadto kun duna siya’y mga reklamo sa video karera, ang NBI maoy iyang pahimoon og operation.

Husto ang gibuhat sa uban nga apilon ninyo pag-report ang illegal nga kalihukan sa pagpamaligya og shabu diha sa inyong mga dapit.

Paabuton nako ang inyong mga report.

* * *

Giingon nga kun manilhig gani ta, unahon nato ang anaa sa atong nataran. Sa ato pa, palpak ang mga opisyal sa City Hall nga mitugot sa pag-operate sa canteen diha sa silong sa City Hall nga walay permit.

Dili ba salikwaot man kaayo huna-hunaon nga mohimo kita og kampanya niadtong wala magbayad og permit, walay mga clearances, nga tua sa layo apan wala kita makaaksyon sa canteen sa City Hall?

Gidumala kini og sibilyan nga miabang sa luna og P12,000 ang buwan walay labot ang bayad sa tubig ug kuryente.