Sugyot

Daghan nang mga pamaagi ang gihimo karon sa gobyerno aron matubag ang suliran sa mga nawagtangan og trabaho bunga sa kalibutanong krisis sa panalapi. Usa niini mao ang paggahin og pundo nga mapahulam sa mga nawagtangan og trabaho aron mapuhonan sa ilang pag negosyo ingon man sa ilang pagbansay-bansay alang sa mga trabahong teknikal aron ilang magamit sa pagpanarbaho dinhi sa ato ug sa gawas sa nasud. Gikonsiderar na usab karon sa gobyerno ang pag-abli pagbalik sa atong pultahan paingon didto sa nasud sa Iraq aron makagawas na ang mga buot motrabaho sa maong nasud. Gidasig na usab ang mga tinun-an sa pagkuha sa mga kursong vocational ug teknikal kay mao kini ang tukma sa mga bakanting trabaho.

Apan bisan pa man niining tanan dili gihapon hingpit nga matubag sa atong gobyerno ang suliran sa mga nawagtangan og trabaho tungod kay ang pundo nga gigahin dili makaigo gumikan sa kadaghan sa mga nawagtangan og trabaho. Dili usab tanan nga nawagtangan og trabaho ang makatrabaho sa gawas sa nasud tungod sa kadako sa magasto, maong daghan gyod gihapon ang mga pasmo o di ba kaha magniwang kun di man ugaling mga boang.

Aduna koy sugyot ngadto sa atong gobyerno. Unsa kahay maayo kun atong papaulion ngadto sa ilang probinsiya kining mga nawagtangan og trabaho ug paumahon. Ang pag-uma para kanako dili lamang tubag sa suliran niadtong mga nawagtangan og trabaho kun dili tubag usab kini sa kakulang sa trabaho dinhi sa nasud. Dinhi molayat na unya ang atong ekonomiya. Mobarato na ang bugas kay gamay na lang ang mamalit og bugas, dili na ta magka rice shortage, dili na ta mangangkat og bugas didto sa gawas hinoon kita na ang mamaligya og bugas.

Pinaagi sa suporta nga ihatag unya sa gobyerno ngadto sa mga mag-uma sama sa yuta alang niadtong wa pay mga yuta nga ma-uma, pundo alang sa pag-uma niini, tubig, abuno, seedlings ug uban pang mga kahimanan o mga gikinahanglan sa pag-uma, labing seguro gamay na lang ang mangita pa og trabaho ug labing seguro dili na ta manglangyaw ngadto sa gawas sa nasud.

Sa programang agraryo ug suporta nga ihatag sa gobyerno ngadto sa mga mag-uuma moubos kun dili man mawagtang ang gidaghanon sa mga nawagtangan og trabaho ingon man ang kakuwang sa trabaho. Ang gikinahanglan lang dili ka tapulan ug dili ka mahadlok nga maitom.