Sentimento sa stall owners

Niining bahina sa akong lindog, tugoti nga hatagan nako’g luna ang sentimento sa stall owners diha sa Minglanilla Public Market. Nakahukom kong ipatik kining gipadangat nilang kasayoran sa pamasin nga pinaagi ning lindog, ikapasabot sa nahingtungdang mga opisyal ang ilang habig ngadto sa mga tag-iya’g stalls sa merkado sa nahisgotang lungsod.

Ang text nga akong nadawat nagkanayon: “Maayong adlaw, Sir. Duna ko’y wa mauyoni sa nagdala nga mga official sa Public market sa Minglanilla. Wala pa man gud gihapoy kuryente ang mga stall. Dugay na kaayo na. Nag-iyahay na lang ang mga stall owner og tap og kuryente gikan sa gawas sa public market. Gikan na mi sa VECO apan di sila makataod og kuryente namo nga mga stall owner kay wala kunoy transformer. Pait kaayo ang among kahimtang kay gawas nga di mi maka-maximize og pamaligya dako pa gyud ang among abangan.” -- 0908-5305543 (Sent: 01:59:44pm-- October 30, 2008)

Para nako, lehitimo kining sentimento sa atong texter nga usa sa mga stall owner diha sa Minglanilla public market. Nagtuo kong angayan gayod hatagan og pagtagad sa mga tagdumala sa maong merkado kining ilang yangungo. Nakasabot kong importante ang kuryente alang sa ilang nagkadaiyang negosyo diha sa merkado publiko sa Minglanilla.

Buyno, mas maayong makapasabot ang mga tagdumala sa Minglanilla public market sa ilang habig. Bukas kining lindog sa ilang reaksiyon. Ug hinaut nga matagad na nila ang sentimento sa stall owners.

* * *

“Naay video karera diri sa Naga, sa may sementeryo dapit, West Poblacion, Mejia St. Kilid sa usa ka poso. Ang among mga anak dili motarong sa pag-eskuyla kay naa na lang pirme sa video karera unahan sa eskina paingon sa municipal cemetery.” -- 0907-7515792 (Sent: 03:03:43pm-- October 30, 2008)

Angay susihon sa Naga PNP kining gitaho sa atong texter aron masuta kun tinuod ba kini o dili.

Mas maayo sab unta kun motabang pag-counter check ning maong taho ang mga brgy. opisyal sa West Poblacion.

Aksiyoni!

* * *

 (Sumbong ug reklamo? Text sa 0910-8105522).