Giawhag sa Malakanyang ang mga ginikanan ug mga tinun-an sa pagkuha og kursong technical o vocational inay kay kurso sa Liberal Arts, Komersiyo ug uban pang kursong professional. Ang rason, dili takdo sa mga trabahong gikinahanglan ang nahisgutang mga kurso sa kolehiyo. Mas labi kunong gikinahanglan karon sa gawas sa nasud ang mga kursong teknikal ug Nursing. Maong gidasig sa Malakanyang ang mga tinun-an sa pagbalhin ngadto sa kursong Nursing ug uban pang mga vocational nga mga kurso kay mao kini ang labing gikinahanglan sa gawas sa nasud.
Ang sugyot sa atong gobiyerno sa pagpakuha sa mga kursong teknikal o vocational aron manarbaho kini sa gawas sa nasud bunga sa kadasig niini sa pagdawat o pagkuha og dolyar gikan sa mga nanarbaho didto sa gawas hinikalimtan ang iyang responsibilidad sa pagpalig-on pagpabarog sa kada pamilya sa nasud nga dili mabungkag. Gitan-aw lamang niini ang iyang kaugalingon ug wala huna-hunaa ang pagbati sa mga pamilyang magkalay-anay.
Kay mihinay ug nahagsa ang atong mga goods nga gipang - export gustong luwason sa atong gobiyerno ang export industry nga nalusno pinaagi sa pagpalig-on sa pag-export sa iyang human resources nga daan na niyang nakita nga dako og natampo sa pagbarog sa atong nasud sa nanglabay nang mga krisis sa ekonomiya.
Tungod sa iyang pagkahangol sa dolyar ug ubang mahalong salapi sa kalibutan gihinginlan na sa gobyerno ang iyang katawhan salimbong ang maayong maskara (ang pagdasig sa pagpatrabaho niini ngadto sa gawas ug ang pagpakuha niini sa mga tinun-an sa mga kursong dali ra kunong makatrabaho didto sa gawas sa nasud) aron dili maklaro ang yawan-on niining tumong.
* * *
Motaas pa gayod unya ang pagpaila ni Michael Buffer kang Manny Pacquiao unya sa ilang away ni Hatton karong umaabot Mayo 2 tungod kay aduna na usay bag-ong titulo nga nakapatong kang Pakman. Si Emmanuel D. Pacquiao kon Pakman usa na unya ka doctor karong Pebrero 18. Ihatag kaniya sa Southwestern University ang pasidungog nga Doctor of Human Kinetics Honoris Causa. Gikatakda nga motambong sa maong pasidungog mao sila si Pangulong Gloria Macapagal Arroyo ug Bob Arum ug uban pang mga inilang tawo sa katilingban.