Ang mukha ng tao

Ang mukha ng tao’y iba’t ibang hugis

May mukhang maganda at mayroong pangit;

May nakakatuwa may nakakainis

May mukhang marusing may mukhang malinis!

Sa loob ng bahay ating nakikita

Kahi’t magkapatid mukha’y magkaiba;

Sa mga magulang kung ikukumpara

Mga anak nila’y iba rin ng kara!

Habang naglalakad sa mga lansangan -–

Mga kasalubong ay ating pagmasdan;

Mukha’y magkaiba kahi’t magsinggulang

Ang mukha ng isa’y pangit ilarawan!

Kung kambal ang bata ating mapapansin

Sila’y magkamukha pero kaiba rin;

Pagmasdang mabuti’t ating siyasatin

At matutuklasang ang isa’y may taling!

Tabingi ang mukha ng isang kapatid

Dahil nang isilang ito ay pinilit;

Doon sa ospital dahil sa masikip

Naisip ng doctor gamitan ng forcep!

Malapad ang mukha nitong si Golden Boy

Sa suntok ni Pacman nagkabukol-bukol;

Ang mukha ni Pacquiao palibhasa’y Pinoy

Kahi’t katamtaman tinanghal na kampeon!

Dahil sa maganda ang mukha ni Angel

Mga pelikula ay kagiliw-giliw;

Ang kanyang katambal lalaking magiting

At saka ang mukha Adonis ang dating !

May mukhang magaspang pero ang ugali

Ay lubhang maganda at iba ang uri;

Siya’y pasensyosyo’t laging nakangiti

Busilak ang puso’t tunay na kalahi!

Sa mukha ng tao’y ating malalaman

Kung siya’y mabait kung siya’y matapang;

Ang ugali’t ganda ng sangkatauhan

Sa mukha ng tao ay matatagpuan!