Dekalidad nga edukasyon

Daghan ang mirebenta sa lakang sa Commission on Higher Education pagpuno og dugang tuig sa pipila ka kurso sa kolehiyo. Adunay mga protesta, ilabina sa mga estudyante, ang mitumaw karon tungod lagi sa ilang giingong dugang palas-anon sa ilang pagtuon.

Naukay man gud ang tanan sa dihang mianunsiyo ang CHED nga sugod karong tuiga, usa ka tuig ang ipuno sa pipila ka mga kurso sa kolehiyo sama sa nursing ug education. Matud pa sa CHED, gituyo kini aron mas dako unya ang kinaadman nga makab-ot sa mga estudyante panahon unya sa ilang pagpanarbaho dinhi sa Pilipinas ug sa ubang nasud.

Apan wala makaayon ang ubang sektor niini. Matud pa nila nga naghatag lamang hinuon kini og dugang gasto alang sa mga tinun-an ug dugang trabaho alang sa mga magtutudlo.

Hinuon kun atong hunahunaon, adunay punto usab kining mga naapektohan sa maong lakang sa CHED. Alang sa mga ginikanan, nagkahulogan kini og dugang balayranan sa tuition sa eskuwelahan aron sa ingon makalampos ang ilang mga anak sa pagtungha.   

Alang usab sa mga tinun-an ang hinungdan ngano nga grabe ang ilang oposisyon sa maong lakang sa CHED mao ang ilang pag-antos ug lain na usab nga tuig sa kolehiyo. Alang kanila, hangak na kaayo ang pag-inat sa ilang kurso gikan sa upat ngadto sa lima ka tuig.

Hinuon misimpatiya usab sila sa ilang ginikanan kinsa magpangalot na usab sa ilang ulo tungod lagi sa dugang bayronon sa tuition nunot sa pag-inat sa tuig sa kurso sa ilang mga anak ngadto sa lima ka tuig.

Alang usab sa mga magtutudlo nga misupak niining lakang sa komisyon, dugang na usab kini nga trabahuon. Ug kay lagi napun-an na man usab ilang serbisyo, dili usab kalikayan nga mangayo sila og dugang insentibong pinansiyal gikan sa kagamhanan    

Apan insakto kaha ang lakang sa CHED pagdugang sa tuig sa pipila ka mga kurso?

Hinuon daghan usab ang misuporta sa maong lakang sa komisyon gumikan usab lagi sa paningkamot sa kagamhanan pag-isa sa kalidad sa edukasyon sa nasud.

Alang kanila, walay laing inisyatibo nga angay buhaton sa kagamhanan kundili ang patas-an na lamang ang tuig sa mga kurso aron mas competitive ang mga propesyonal unya sa ilang pagpanarbaho dili lamang dinhi sa Pilipinas kundili hasta usab sa gawas sa nasud.

 Sa akong tan-aw, insakto usab ang CHED sa lakang niining pag-isa sa tuig sa pipila ka mga kurso. Dako kini og ikatabang sa educational development sa usa ka tinun-an alang unya sa iyang pagpanarbaho.

Bitaw. Karong panahona ubos kaayo ang kalidad sa mga batan-ong propesyonal dinhi sa Pilipinas. Kini atong makita sa ka taas nga unemployment rate sa nasud tungod usab kay maglisod gayud pagpangita og trabaho ang atong mga bag-ong gradwar sa kolehiyo.   

Ang pagkaubos sa kalidad sa atong mga bag-ong gradwar sa kolehiyo mao usab ang hinungdan ngano nga sa mga survey, nangiwit intawon ang Pilipinas sa listahan sa mga maayong batan-ong propesyonal sa kalibotan.

Dili kini maayong talan-awon gumikan kay kuyaw kun moabot ang panahon nga wala na unya’y mosalig sa abilidad sa atong mga propesyonal ug sa sistema sa edukasyon sa nasud.

Dili na man siguro nato ikatingala kining lakang sa CHED pag-inat sa tuig sa pipila ka kurso ngadto sa lima ka tuig. Kini gumikan kay aduna nay mga kurso nga tag-lima na ka tuig sama sa engineering courses.

Kun gusto gayud kita nga makakat-on ang atong mga batan-on og dekalidad nga edukasyon alang unya sa ilang maayong kaugmaon, nganong dili man nato suportahan kining maong lakang sa CHED?

* * *

Email: [email protected]