P10 nga peke

Niay angay bantayan sa atong kaigsuonan. Nakadawat ko’g balita gikan sa usa ka kasaligang tinubdan nga adunay gipakatap karon nga peke nga P10 nga biyugol o plata.

Kun makadawat mo’g P10 nga biyugol, mas maayong inyo una kining hilngon kay tingalig mini ang maong kuwarta. Sayon rang ilhon ang maong mini nga kuwarta pero kun dili ka magbantay, malingla ka niini.

Sumala sa atong tinubdan, kining maong peke nga P10 mao kadtong piso (P1) nga karaan nga gi-demonitized na. Gilungagan sa mga badlongon ang tunga nga bahin sa maong kuwartang biyugol unya gipahaom nila sa lungag ang 25 sentabos.

Tungod niini, kun kalitan sa pagtan-aw susama gyud sa P10.00 nga genuine ang maong kuwarta. Mao nga angay gyud ning bantayan sa atong kaigsuonan. Peligro kun mailad ta niini.

* * *

Ang naggamit sa cell. no. 0909-5019394 mi-text nako (sent:07:49:14am-- November 4, 2008) aron pagpadangat sa kasayoran nga adunay usa ka night high school sa dakbayan sa Sugbu nga ang canteen sa sulod sa maong eskuylahan illegal nga nag-operate.

Gihulagway sa atong texter nga walay legal documents to operate ang maong school canteen gawas lang sa permission nga giisyu mismo sa principal. Wala kunoy health o sanitary permit ang maong canteen.

Midugang ang atong texter nga kining maong canteen nga nag-operate sulod sa school campus gipanag-iya sa usa ka Mrs. N. Namaligya kuno ang maong canteen og pan-os nga mga pagkaon. Daghan nang nireklamo pero morag wala kunoy epek.

Kun tinuod ang alegasyon sa atong texter, kuyaw para sa panglawas sa mga estudyante ang mga pagkaon nga gibaligya sa maong canteen. Labing maayo nga masanta kining hiwi nga sistema sa operations niini.

Dangop mo sa health division sa Cebu City hall aron ilang maaksiyonan kining maong problema. Buhata kini sa labing daling panahon.

Aksiyon dayon!

* * *

(Sumbong ug reklamo? Text sa 0910-8105522).