Unang labok ni Obama

Tulo ka adlaw palang human makalingkod sa pwesto, nipalabang na og kontrobersyal nga lakang ang presidente sa Amerika nga si Barack Obama. Kung atol sa mga kompanya ug sa iyang pagdaog sa katungdanan, ningisi ang tibuok kalibutan ug nakadawat daghang pagdayeg ang labing unang African-American nga presidente, karon gisugdan na sa pagkondinar ang pipila ka lakang ni Obama. Inay ang problema sa krisis sa ekonomiya ang unang atubangon, na-una pa sa pagpalabang ang lakang pagpapas sa Mexico City policy. Ang maong polisiya maoy magbabag sa Federal government sa Amerika nga nagpugong sa pag-gamit og pundo aron suportahan ang pro-abortion nga mga lakang.

Giingong nikabat sa US $461 million ang gigahin sa bag-ong administrasyon sa Estados Unidos matag tuig aron kapundohan ang mga lakang pabor sa abortion. Ug tungod kay kay Barack ang mayoriya sa kongreso ug senado sa Amerika, gipanlantaw nga wa’y makababag sa bag-ong ni Obama. Ang papas sa Mexico city policy nagpasabot og pagpabor sa abortion ug ang gitawag nga stem cell research nga ang tumong mao ang pag-gamit sa ‘embryo’ sa pagtambal sa nagkada-iyang sakit. Matod sa mga moralista, imoral ang mga lakang sa bag-ong administrasyon tungod kay ang abortion ug ang pag-gamit sa embryo fertilization wa’y kalainan sa pagpatay sa kinabuhi sa usa ka tawo.

Nagkisi-kisi ang simbahang Katoliko ning bag-ong lakang ni Obama. Kung sa panahon ni kanhi presidente George Bush, wa’y mga balaod nga napasar pabor sa abortion ug stem cell research, karon tulo ka adlaw palang sa iyang paglingkod nipagawas na sa iyang kolor si Barack. Nalisang ang mga moralista nga basin sugod palang ni sa mas dako ug daghan pang kontrobersyal nga lakang ni Barack nga magbutang sa kinabuhi ug pagpuyo sa tawo sa dakong hulga. Kung sa iyang pagdaog sa pagka-presidente di’ lang ang mga Amerikanong pabor kang Barack ang nalipay apan ang tibuok kalibutan, karon, hinay-hinay nang nabuak ang pagsalig sa bag-ong pangulo sa Amerika tungod sa maong lakang.

Protesta ug ang mas palapdan pang pag-edukar sa publiko ang planong himuon sa Humal Life International ug sa uban pang organisasyon nga nanalipod sa kinabuhi sa usa ka tawo gikan sa sabakan sa inahan hangtud na sa lubnganan. Apan gi-angkon sa grupo nga lisud ang bag-ong hagit nga naghulga karon tungod kay naka-pwesto na ang mga non-government organizations nga maoy mangu’ sa kampanya pabor sa abortion. Nabalaka ang mga moralista nga basin wa’y padulngan ang ilang pagsaba-saba sukad pa kaniadto supak sa ‘reproductive health bill’. Nahugno ang simbahan nga basin wa’y kapa-ingnan ang ilang pag-edukar sa publiko nga usa ka dakong krimen ang pagpatang-tang sa bata ug nga bisan ang paghuna-huna lang nga imong ipa-abort ang bata, dako na ning kasaypanan sa kahitas-an.

Apan dakong sayop sab ang nag-ung-ong karon alang sa mga kongresista nga gikabalak-ang mahaylo sa kuwarta kun o galing moabot na ang minilyon dolyares nga pundo sa Amerika aron lang mapalabang ug suportahan sa tibuok kalibutan, labi na sa mga dagkong populasyon nga mga nasud, ang kontrobersyal nga desisyon ni Barack. Naila ang bag-ong presidente sa Amerika sa iyang pagka-charismatic kon ang pagka-init sa pakiglambigit ini sa ubang sa tawo hinungdan nga nabalaka karon ang grupo sa pro-life nga daghan ang makombensir si Barack aron suportahan ang lakang.

Dako ang paglaom sa publiko sa bag-ong administrasyon sa Amerika. Apan kung tan-awon ang usa sa nag-unang mga lakang sa bag-ong presidente, nabutang karon sa dakong hulga ang kinabuhi sa mga tawo. Mabutang sa dakong alaot ang tawo nga nag-depensa sa katungod ug moralidad sa mga tawo kung magpadayon ug magsunod-sunod ang mga lakang ni Obama batok sa pagpuyo sa mga tawo. Mas gihatagan pa siguro og pagdayeg ang bag-ong presidente kung gihatagan pa inig dinaliang solusyon ang krisis sa ekonomiya. Kung ang sagad sa mga presidente o lider sa katilingban sukdon ang unang usa ka gatos ka adlaw sa pamunuan, karon palang gihusgahan na sa uban ang mamahimong administrasyon ni Obama su’d sa upat ka tuig nga termino.