Usa ka pari ang kanunay’ng hikit-an nga masalay lang og kaon. Hinuon mouli baya siya sa kumbento. Usa ka adlaw niana siya gipangutana sa iyang mga parokyano kun siya ang nakahunahuna nga modagan pagka-Mayor. Ang pari igo lang mipahiyom dungan ang pag-ingon: “Dili na kinahanglanon nga ako molansar pa, kay ako naglibod-suroy dili aron sa inyong boto mangahoy kun dili aron kamo sa simbahan mag-ambahan!”
Pamalandong
Kun ang Gobernadora dunay Suroy-Suroy sa Sugbu ug ang Mayor sa mga barangay nganong dili man mahimo kang Kura alang sa bisita Kapilya?” Ang katawhan bisan pa man sa kahagip-ot sa panahon ang malipay kun pari nila moduaw aron kanila maminaw. Kay kun buot hunahunaon, imbis mga tawo ang magsakripisyo aron moadto sa parokyang sentro, mas haom man tingali nga ang pari na lang ang magsakripisyo og adto sa bukirang bahin aron Ginoo dad-on didto. Gawas pa, mahal na ang plite padre, mao nga palihog duaw na lang sa layo bisan pa man kun kolekta mo sensilyo, apan sa buhat nga maalagaron gilipay mo ang Ginoo!