Boykot sa Sinulog?

Unsay mahitabo kun magkasabot ang mga sakop sa media sa di pag-cover sa Cebu City Sports Center sa Sinulog Grand Parade sa sunod tuig? Unsay sangpotanan kun magkauyon ang mga sibyaanan sa radyo ug telebisyon nga sa ikatulong Domingo sa Enero 2010 isibya ang naandan nilang mga tulomanon ug di na maghago paggasto og dakong kuwarta, ni pagpakatap sa tanan nilang kawani ug kahimanan?

Lisod ning mahitabo apan may mga sukaranan pagboykot sa sentro sa parada:

• Gipabayad ang mga Sugbuanon sa grandstand bisan ilang buhis ang gigasto sa kalihokan; ug

• Di angay’ng mamugos ang media pag-cover sa dapit nga mora silang sanglahon nga gipalayo sa kalihokan.

* * *

Karaan nang reklamo ang pagpalayo sa mga tigpasiugda sa Sinulog sa TV cameras gikan sa grand stage. Hagbay rang naglisod ang mga sibyaanan sa telebisyon pagpasabot sa ilang viewers nganong morang field demonstration ang ilang coverage. Apan morang ginudnoran og asin ang nagngutngot nang samad dihang kuwang na la’g diyutay nga patungtungon sa mga tigpasiugda sa stage ang Sinulog photographers, nga ang kasagaran way klarong outlets.

Sa sinugdanan, nagduda kong may mga sakop sa Sinulog Foundation (SFI) nga tua kapusta sa photographers ug nagdumot sa TV stations. Apan nahadlok kong, sama sa naandan, kuwarta na say hinungdan. Kay ang matag magpa-rehistro nga maniniyot pabayron og P500.

* * *

Atubangan sa talagsaong kalamposan sa Sinulog 2009, way mangahas pagpamuyboy sa SFI. Apan sa kinauyokang bahin sa ilang kasingkasing nahibawo sila sa dakong tampo sa media sa kalamposan sa Sinulog. Gawas kun nituo nga igo nang pila ka libo nga nakabayad ug nakalingkod sa grandstand pagsangyaw sa kanindot sa parada.

Inay pasalamatan, o bisan ilhon na lang ang ilang tampo, ang mga sakop sa media, gawas nga gibutang sa ngilit, gihigpitan pa gyod sa ilang accreditation. Mas manggihatagon ug masinabuton ang SFI sa panahon nilang Nato Osmeña ug anhing Dodong Aquino. Nakaparat kay ang gipa-kuwintas sa media IDs mao na hinuon ang kolorum nga mga sakop sa media.

* * *

Di mahimong boykotan sa media ang Sinulog. Tinuoray ning tinubdan sa garbo ug bugkos sa panaghiusa sa mga Sugbuanon pagbalaan sa milagrusong si Sr. Sto. Niño. Nga molahutay bisan isnabon pa sa media.

Apan katam-is kaha sa pahiyom sa media kun usa ka tuig gikan karon magkarakara si Ricky Ballesteros pagpanawag sa mga sibyaanan aron pahibaw-ong mga Sugbuanon nga hapit na magsugod ang parada ug mahimo bang mangadto na sila sa sports center, way bayad may pakapin pang snacks. O sa liwas sa Piyesta Senyor manghangyo si Mike Rama nga mahimo bang isaling-it pagsibya ang listahan sa mga mananaog sa parada ug iyang pahibawo nga sa kataposan wa na sila maproblema sa crowd control.

Email:[email protected]