Pamolitika sa RBS

Kumusta na ang Rural Bank of Subangdaku?

Ang mga investors sa RBS Mandaue nagpaabot karon nga mo-takeover ang Philippine Deposit Insurance Corp. aron maatiman ang mga depositors sa maong bangko kang kansang mga deposito ‘covered’ hangtod sa P200 mil.

Nabalitaan nako nga ang mga depositor sa RBS nag-organize aron matun-an ug mahimo nila ang tukmang lakang batok sa mga opisyal ug tagdumala sa RBS Mandaue, karon nga wala gihapon sila’y balita kalabot sa ilang mga deposito.

Ang matag lakang nga himuon sa mga depositor masabtan nato nga usa ka katungod.

Apan maayo tingale nga kalmado na lang kita nga moatubang sa sitwasyon. Sa gamay nakong nahibaw-an sa Banking Laws, wala gyu’y laing mahitabo nianang pagpanira ug pagdeklarar og bank holiday sa RBS ug sa ubang mga Rural Banks, ilabi na kadtong ubos sa Legacy Group, gawas sa paghulat nga mo-takeover ang PDIC sa bangko nga nanira.

Maghulat na lang kita nga moaksiyon ang PDIC ug mao na ang mobayad sa atong gideposito kay sa modangop pa kita og mga lakang nga wala mahasubay sa proseso.

Kapoy-kapoy na, makagasto pa ta. Doble na ang alkanse.

Ang mga investors sa RBS Mandaue nanawagan sa kakalma sa tanang mga depositor sa maong bangko. Dili lang tingale ang mga depositor sa RBS ug sa mga nanira nga mga Rural Bank ubos sa Legacy Group ang mopakalma sa kaugalingon, kun dili lakip na kadtong mga depositor sa ubang mga Rural Bank nga nagbarog ug wala matandog sa krisis sa ekonomiya.

Dili tinuod nga apektado ang tanang mga Rural Bank sa paglayas sa investor sa Legacy Group. Adunay daghang mga Rural Bank nga gipanag-iya og mga adunahang mga negosyante nga hangtod karon nakasugakod sa krisis.

Subo lang palandungon nga adunay mga indibidwal nga misakay sa higayon.

Sama pananglit sa bank holiday sa RBS, nagamit gyud intawon sa politika. Usa ka konsehal sa siyudad sa Lapulapu nakasakay sa higayon pinaagi sa paggamit sa RBS pagdaot sa kontra niya sa politika.

Maayong masayod kining maong konsehal nga dili maayo ang iyang gibuhat pagpamolitika sa isyu sa RBS tungod kay makalawgaw lamang kini og samot, ilabi na ngadto sa mga depositor nga naaburido sa nahidangatan sa ilang deposito.

Dili angay ipamolitika ang nahidangatan sa RBS. Makadaot kini sa ubang mga Rural Bank nga naninguhang makasugakod taliwala niining gisagubang natong mga kalisud sa natad sa pamangko.

Undanga na lang na, konsehal!

* * *

SRP. Ihinayon o dili ni Mayor Tomas Osmeña ang iyang kiha nga iyang gi-anggaan og “economic sabotage” batok sa Kapitolyo, magpabilin nga “patay nga proyekto” ang South Road Properties (SRP) kun idayon sa Kapitolyo ang pagkuwestiyon ngadto sa korte sa pagbasura sa Joint Venture Selection Committee (JVSC) sa ilang aplikasyon pag-ugmad pinaagi sa joint venture sa usa ka luna sa SRP.

Ang kiha unya sa Kapitolyo batok sa JVSC magdulot og kalangay sa pagpatuman sa joint venture tali sa kagamhanan sa dakbayan sa Sugbo ug sa Filinvest nga modagan og dugay’ng katuigan.

Ang akong gikuyawan kun moatras na lamang ang Filinvest tungod sa pagpanglawgaw sa Kapitolyo sa joint venture scheme sa City Hall ug Filinvest.

Wala ba kamo maglibog nganong gusto gyud nga lubogon ug lawgawon sa mga Garcia ang SRP?

Dili ko motuo sa kasensiro sa Kapitolyo sa ilang interes pag-ugmad og luna diha sa SRP.

Nganong makig-joint venture man ang Kapitolyo nga gidumala sa mga Garcia nga hilabihang kakontra ni Mayor Tomas Osmeña?

Motuo diay ka nga si Juan makigsosyo og negosyo sa iyang kontra nga si Pedro?

Ibutang nato nga sensiro ang Kapitolyo, apan ngano man gyud nga ang luna nga gusto nilang ugmaron ang luna man nga apilan og joint venture sa Filinvest?

Ang Filinvest naila nga labing dako nga real estate developer sa kalibutan. Daghan og dagkong mga proyekto ang ilang nahimo sa bisan asang suok sa Pilipinas.

Unsay real estate development record nga mapresentar ug matugbang sa Kapitolyo sa mga nahimo sa Filinvest? Kanang mga karsada sa kalungsoran nga giangkon ni Atty. Rory Sepulveda nga trabaho sa Kapitolyo? O kanang mga proyekto sa mga mayor nga didto lang gipaagi sa buhatan sa gobernador?

Kataw-anan!

Nasayod usab ang mga abogadong consultant ni Gobernador Gwendolyn Garcia nga wala itugot sa ngalan sa kaangayan ug hustisya nga ang usa ka sanga sa gobyerno makigkompetensiya sa usa ka pribadong kompaniya.

Dili malalis nga ubos sa balaod, ang lalawigan sa Sugbo usa ka corporate entity nga makahimong maka-intra og negosyo sa tumong nga makalikom og revenue.

Apan wala kana magpasabot nga ang usa ka lokal nga kagamhanan, isip corporate entity, gihatagan og lisensiya sa balaod nga makigkompetensiya og usa ka pribadong patigayon. Wala magpasabot ang balaod nga ang Kapitolyo sa Sugbo mahimo na nga makigkompetensiya sa Filinvest.

Hinuon, kanang pakigkompetensiya naa na gyud sa mga Garcia.

Ambot og nadayon ba, ang Third Party Liability (TPL) insurance gikuha sa Government Service Insurance Systsm (GSIS) nga gidumala ni Winston Garcia, igsuon ni Gobernador Gwendolyn Garcia. Pila ka gatus ka mga pribadong insurance firm ang makuhaan og negosyo tungod sa kalaki ni Winston?

Maayo na lang gani kay napakyas si Winston pag-ilog sa Meralco.

* * *

Inyong reaksiyon, i-text sa 0915-7817491 o [email protected].