EDITORYAL - Gubot pas lukot gihapon

Ang among giingon nga sa makausa pa makasinati nasab kita’g pagkayamukat sa traffic adtong miaging Sinulog festival nahitabo gyud.

Sama sa mga nangaging Sinulog, ang traffic maayo gyung pagkalukota (gubot pa sa lukot) ug ang nasakripisyo og dako mao ang mga komyuter.

Nagdahom ang kadaghanan nga aduna nay solusyon ang traffic authorities alang niining situwasyon, tungod sa kasinatian sa nangaging Sinulog, apan wala diay.

Dili ba gyud mapahapsay ang traffic atol sa Sinulog? Wa ba gyuy paagi ang traffic czars nga makab-ot ang maong kahapsay?

Duna pay dose ka buwan gikan karon hangtud sa Sinulog 2010. Maayo tingaling sugdan na ang pagtuon nga dili masubli ang problema sa traffic nga atong nasinati kada pahigayon sa Sinulog.