Sa sunod nga Sinulog

Subling gipakita sa Sugbo sa kalibutan nga sentro sa festival ug nag-unang tourist attraction ang dapit human sa malampusong Sinulog mardi gras. Sa maka-usa pa, gipamatud-an na sab sa mga Sugbuano nga buhi ang pagtinabangay, panag-hiusa ug pakigtambayayong alang sa usa ka tumong. Gipakita sab sa mga Sugbuanon nga pwede rang magkahi-usa ang kultural ug relihiyosong aspeto tungod ug alang sa batang Jesus. Ang tanan, nagpasabot lang nga adunay dakong paglaom ug kalambuan nga nagpaabot pa sa duyan sa Kristyanismo sa Asya.

Ang tanan, nagpasabot lang nga may daghan pang pwedeng mahimo alang sa mas hapsay ug mabulokon pang kasaulogan. Gumikan sa pagpakabana sa katawhan ug nagpusot-pusot nga mga suhestyon, mas nahatagan og kabag-ohan ang mga butang nga kaniadto maisip nga problema. Karon, ang hagit alang sa tanan, unsay pwede pang mahimo alang sa ika-traynta ka tuig sa Sinulog festival sunod tuig. Ania ang pipila sa mga suhestyon:

1. Hatagan og lima ka minutos ang tanang contingent sa pag-ampo sa tunga-tungang bahin sa mardi gras. Na-obserbahan sa mga tawo nga kung magsugod na ang pagsayaw sa kadalanan, mawa’ na ang relihiyosong aspeto sa kasaulogan tungod kay ang tanan, nakatutok na lang sa mga pasundayag. Ang pag-ampo sa alas dose sa udto, sa tanang mananayaw ug mga tawo nga ana-a sab sa kadalanan aron sa pagtan-aw, maoy magpahinumdum sa tanan nga ang tinud-anay nga rason sa okasyon mao gyud si Sr. Sto. Niño.

2. Pangitaan pa gyud og mas epektibong solusyon ang tinuig nang problema sa dagan sa trapiko. Kung sa mga miaging Sinulog, huot ang dagan sa mga sakyanan sa mga da’n nga di’ kaagian sa rota sa parade, karon susamang problema ra gihapon ang nasugatan. Basin dako og matabang kun idili ang pag-park sa mga sakyanan diha kilid sa da’n aron nga adunay igong hawan nga pwedeng kaagian sa mga motorista.

3. Ibalik-balik sa pagpahibawo sa mga tawo nga mas labing maayo ug mas makatabang sila sa kinatibuk-ang kasaulogan, labi na sa Sinulog festival aron nga dili maghuot ang kadalanan ug mas hapsay ang mga kalihukan tungod kay gamay ra ang mga sakyanan nga nag-biyahe. Ang pagpasabot sa mga adunay sakyanan nga sakripisyo na lang atol sa maong adlaw ang ilang paghiklin una sa ilang mga sakyanan aron lang makatabang sa dugay nang problema sa trapiko matag Sinulog.

4. Dugangan pa og mga portalets sa kadalanan aron maka-serbisyo sa minilyon ka mga tawo nga modagsa sa kadalanan. Mas maibanan ang kabaho ug kahugaw sa palibot kung ang mga tawo adunay lugar nga pwedeng kapagawsan sa ilang mga hugaw. Angayang hinumduman nga ang kalampusan sa pagpahigayon og festival o ka-fiestahan, nag-agad sa kalimpyo sa kinatibuk-ang proseso. Ug alang sa mga bisita, lokal man o langyaw, masukod ang kalampusan sa kinatibuk-ang okasyon sa kalimpyo sa palibot.

5. Ibutang sa tukmang lugar ang mga tawo nga namaligya og pagkaon ug di’ tugotan nga bisan asa na lang magbutang sa mga stall aron kabaligyaan sa barbecue, puso ug uban pang pagkaon nga ibaligya atol sa kasaulogan. Mas maayo sab kung adunay hingpit nga pagmonitor sa mga ilimnong makahubog nga ibaligya lang bisan asa. Angayan hinumduman nga ang kasaulogan sa sinulog nagka-gikan sa relihiyosong aspeto hangtud nga nahimugso ang festival, baynte nueve ka tuig na ang nilabay. Ang pagpa-party sa kadalanan, pakapin na lang sa tinud-anay nga kamahinungdanon sa kasaulogan ug di’ maayo nga sa mga mosunod nga katuigan, mahimong rason sa mga tawo ang pagbisita sa Sugbo ang mga party o ubang kahilayan inay ang relihiyosong katuyoan.

6. Mas bukas pa ang mga organizer sa nagkadaiyang suhestyon nga pwedeng magamit o pwedeng kapanaminan. Ang kalampusan sa Sinulog naggikan sa mga nagtinabangay nga katawhan nga puno sa kadasig ug kamaya sa pagsaulog sa pagtuo ug pagyukbo ni Sr. Sto. Niño. Ang tanang aspeto sa kasaulogan, pwede pang makapanindot ug magpalig-on kung mas bukas pa ang siyudad sa nagkadaiyang mga suhestyon. Di’ man perpekto ang kinatibuk-ang kasaulogan apan mapasigarbohong isabwag sa mga Sugbuano nga su’d sa dugay nga panahon, ang Sinulog festival ang nahimong gigikanan sa uban pang mga kasaulogan sa nasud.