Usa ka milyon matag buwan

Ang director general sa Presidential Management Staff nga si Secretary Cerge Remonde mitug-an nga nabugnaw siya pagsud sa politika kini tungod kay iyang nakita ang pabiling pagdominar sa kwarta.

Matud niya nga wa pa gani siya modeklarar nga modagan apan duna nay grupo nga nangayo og budget.

Si Remonde kinsa gihugonhugonan nga molansar pagka-kongresista sa south district dinhi sa dakbayan o ba kaha sa segundo distrito mitug-an nga dunay grupo sa mga political operators nga mipadala niya og budget proposal nangayo og usa ka milyon ka pisos matag buwan.

Si Remonde nagkanayon nga ang maong grupo mitanyag nga magsugod na sa pag-organisar aron magamit isip makinarya sa eleksiyon pagduso sa iyang kandidatura. 

Suma pa ni Remonde nga nasagmuyo kaayo siya niini tungod kay nagpakita ni nga ang politika sa nasud gidominar gihapon sa kwarta.

Kun mosanong siya sa gipangayo sa grupo sa mga political operators nagpasabot ni nga kinahanglan siya nga mogasto og di mokubos sa 15 milyones pisos hangtud sa eleksiyon.

Mao nga matud niya nga kun ingon niini ka dako ang gastuhon aron magpapili aron pagserbisyo sa katawhan daghan ang mga desente ug tarong mga mga tawo ang mabugnaw. Haum og tukma ang iyang pamahayag nga kini maoy hinungdan nga ang mahabilin mao nalang kadtong mga kurakot.

Pwera sa mga tarong nga mga kongresista, apan mao ni ang dakong hinungdan nganong nagkamoritsing ang atong kongreso.

Kinsa man tinuoy buotan ug tarong nga tawo ang ganahan nga mopapili kun ingon niini ka dako ang gastuhon unya pila ray sweldo sa kongresista.

Resulta niini, mapugos sa pagpangurakot ang modaog aron mabawi ang ilang nagasto. Ang maong sistema maoy kinahanglang usbon aron magmalamboon ang atong nasud.

Hangtud dili mausab ang maong sistema wa gyu'y kalamboan nga mapaabot ang atong nasud.

Apan bisan pa kun iyang giangkon nga siya nabugnaw sa pagsud sa politika, apan daw sa mapanagan-on gihapon siya nga moluwat og klaro nga baruganan kun molansar ba o dili.

Sumala pa niya nga wa pa siya maghuna-huna og politika sanglit buot niya nga unahon una pag-atiman ang iyang gimbuhaton.

Tulokibon hinuon kaayo ang iyang pamahayag nga kun kabubut-on gyud sa katawhan lisud sab ni nga balibaran.

Maylabot sa pangutana kun asa siya modagan, sumala pa niya nga kun mahitabo man gani, adto siya sa habagatang distrito sa dakbayan.

* * *

[email protected]