Idayon gyud ni Obama ang iyang gisaad nga tax cut

ISa inyong nasayran, nagkagrabe ang suliran sa ekonomiya sa Amerika. Nagkadaghan ang nasirhan nga dagkung negosyo, nagkadaghan ang nawad-an og trabaho, ug nagkadaghan usab ang mga Amerikanhon nga nagsalimuang.

Atong makita sa mga hulagway ni Obama nga dili kaayo siya malipayon sa iyang pagka-pili nga Presidente sa Amerika, gumikan sa mga dagkung suliran nga iyang na-inherit gikan ni Presidente Bush.

Kini lang gubat sa Middle East, sa pagkakaron, wa pay klaro kun mag-unsa siya. Samtang supak siya sa nagpadayon nga gubat, dili siya dihadiha makapa-withdraw sa tanang kasundalohan sa Amerika gikan sa gubot nga mga dapit sa Middle East.

Sa ekonomiya, unsa man? Of course, di ta makapaabot nga iya kining masulbad overnight. Dugay pa ni. Lagmit, mahuman na lang iyang term, di pa gyud tingali maulian sa hingpit ang ekonomiya sa Amerika.

Mahug na lang ni si Obama nga trouble shooter. Nga kun mapakyas siya, mosamot ka hagba ang ekonomiya sa Amerika, ug kun molampos, ang mosunod na niyang Presidente maoy makapahimulos sa iyang pagka-maayong trouble shooter.

Apan, niay maayong development. Taliwa sa nagkagrabe nga krisis, diin ang Federal government, magkinahanglan untag dugang revenue, ipadayon ni Obama ang iyang nahinaykan nga saad sa miaging eleksiyon pagpa-us-os sa buhis.

Karon, giingon nga iyang ipadayon ang balig $310 bilyones nga tax cut, alang sa mga establishment ug individuals. Nindot kaayo. Ambut unsaon ni pagpaagi, apan, akong amigo nga American citizen, si Atet Oliva, miingon nga rebate gyud. Sa ato pa, kun American citizen pa ko ron, makadawat kog tseke gikan sa federal government, tipik ug resulta sa tax cut ni Obama.

Mahimo kaha ni dinhi sa atong nasud, Dro? Kinsa kaha sa ato karong mga nangambisyon pagka-Presidente sa nasud ang mosaad nga mag-tax cut after the election? Kinsa kaha ang mosaad nga i-exempt ang mga senior citizen ug mga disabled gikan sa evat? Ug kinsa kaha kanila ang mosaad ug motuman niini nga dili mopasaka sa mga bayranan sa buhis sulod sa iyang termino?

Ug labaw sa tanan, kinsa kanila ang mosaad nga hunungon na for good ang lying, cheating ug stealing sa atong nasud? Ug hinumdumi, lain ang pagsaad, lain ang pagtuman!