Kuyaw nga pamahayag

Usa nako ka higala nga “viewer” sa DYLA webcast, mitug-an nga biktima diay siya sa kalit nga pagsirado sa usa ka rural bank dinhi Sugbo.

Daku-daku g’yod tawon ang puhonan nga nawala kaniya kay ang Philippine Deposits Insurance Corporation (PDIC) mobayad ra man kutob sa P250,000.

Nag-atubang karon og daku nga problema ang negosyo sa mga rural bank sa Sugbo. Wala nay mi-invest og mga puhonan kay ang uban gani buot man nga mo-withdraw sa ilang deposito.

Ang wala masabti sa uban nga ang mga rural bank sa lainlaing dapit gipanag-iya og lainlaing mga tawo. Kun mapurdoy ang usa ka rural bank, lahi ang sitwasyon sa pikas.

Nakasabot ko nga kun dunay dinaghan ug dinagko nga withdrawal sa mga deposito, apektado g’yod ang negosyo sa bangko kay gipadagan man sab na nila og laing negosyo ang ilang kwarta.

Sama didto sa Argao, diriyot g’yod tawon mabiktima sa “mass withdrawal” ang usa ka rural bank tungod sa binuang sa usa lang ka depositor nga igo lang nagkomedya.

Naglumba tawon ang mga depositor, apil na ang usa ka babaye nga maglisud og lakaw nga walay sungkod, nakaabot sa bangko nga nalimot na lang pagsungkod, tungod sa grabeng kakuyaw.

Gituyo nako kini pagsuwat kay aron makasabot ang mga tawo, ilabi na kadtong mga depositor sa mga rural bank, nga dili sila mabalaka kun manirado ang ubang rural bank kay ang ilang bangko nga gidepositohan sa kwarta, lahi nga bangko.

Kun ang pagsabwag nato og inpormasyon makamugna og kabalisa sa katawhan, basin og mosangpot ra kini og mass withdrawal sa mga deposito ug apektado tawon ang usa ka rural bank.

* * *

Usa tawon sa biktima nga naangin lang sa isyu sa Legacy Bank mao ang Rural Bank of Subangdaku. Tungod sa grabe kaayo nga withdrawal, nahurot ang ilang pundo.

Unya, dunay report sa usa ka mantalaan nga miingon nga ang Rural bank sa Mandaue nakasinati og problema. Pastilan, imbis ang RBS unta ang gipasabot Rural Bank of Mandaue man ang nabutang, hapit na usab unta maapektahi ang negosyo sa maong bangko.

Mao na nga dili g’yod maayo nga mohimo kita og iresponsable nga pamahayag.

* * *

Nabantayan usab nako nga si Konsehal Junard “Ahong” Chan sa Lapulapu migamit sa isyu sa RBS aron makahimo siya og tirada ug atake batok sa iyang kontra. Dili na lang nato ilhon og kinsa.

Dili maayo nga gamiton nato ang isyu sa mga bangko sa pamolitika konsehal Chan kay sa ako nang gisulti, makapahaling ra kini og dugang isyu nga makadaut sa banking industry.

Kun sakyan nato ang problema sa RBS aron makahimo kita og isyu sa kontra nato sa politika, makapasamot ra kini sa pagsilaob sa isyu ug makamugna kini og kakuyaw sa depositors sa ubang rural banks.

Maayo tingali konsehal nga hunongon nato ang pagsugnod og isyu nga may sagol pamolitika, sa isyu nga naglambigit sa mga bangko.

Nakabasa man god ko nga nagsukliay na og mga pulong ang kanhi mga opisyal sa maong bangko. Kun dunay problema, ila ra kining sulbaron, dili maayong atong dugangan pagsugnod og isyu.

* * *

Mitawag diay nako si Mayor Tomas Osmeña kagahapon gikan sa Houston, Texas. Mahinayon g’yod diay ang pagpahigayon og teleconference diin mohatag siya og mensahe human sa Sinulog grand mardigras. Alas siete sa gabii ang gitakda niya nga paghatag sa mensahe.