Cellphone promo

"Good day, Sir. Bahin ba anang mga promo sa Smart. Bisan dili ta mopalit ug motubag sa ilang gi-text nga promo kuhaan man gihapon nila ang atong load. Dili na lang ta katawag o ka-text ba hinuon kay wala na man tay load kay nahurot man. Wala makabuyag ang NTC ana. Makalagot man nang ilang kalaki." -- 0928-7829836 (Sent: 02:10:33 pm--October 16, 2008)

Tinuod ang giingon sa atong texter nga makalagot ning maong kalaki sa mga network provider. Mao kini kalaki nga wala gyoy dag-anan ang subscriber. Unsaon nga ang provider man ang nagkontrolar sa tanan, lakip sa sistema sa paggamit nato sa atong load. Unfair, dili ba?

Nagtuo kong nagkinahanglan tag dugang mga balaod nga makakontrol sa sobrang pagpahimulos sa mga network provider sa ilang mga subscriber.

* * *

"Good day, Sir. Naa pod mangunguot nga mosakay sa mga PUJ padulong south. Like sa Bulacao, naay lalaking tiguwang nga magdalag dakong bag. Limpiyo siyang tan-awon ug buotan kay moplite man gyod. Anha gyod siya lingkod dapit sa may pultahan. Kun makakuot na dali rang makakanaog ug mosibat." -- 0923-6782699 (Sent: 05:50:48pm--October 16, 2008)

Daghang salamat sa imong pahibalo, higalang texter. Hinaot nga pinaagi niini makabantay ang mga sumasakay og PUJ nga magbiyahean sa Bulacao.

* * *

Daghan na diay kaayo ang mga Korean national dinhi sa Sugbu. Mikabat na sa 18,000 ang ilang populasyon.

Welcome sila kaayo dinhi sa atong dapit. Makaayo man sab sa Sugbu ang ilang presensiya. Daghan ang nakabaton og trabaho tungod nila.

Ang mga Koreano nga nia sa Sugbu lainlain og katuyoan. Ang uban mga turista. May mga estudyante ug uban pa.

Kining mga Koreano nga nangeskuyla dinhi sa Sugbu maoy makabenepisyo tag maayo. Kay gawas sa mga Koreano nga motambong og klase sa mga tulunghaan, dunay daghan kanila nga gusto’g one is to one (usa ka estudyante usa ka magtutudlo). Busa daghan ang makatrabaho.

Duna sab hinuoy ubang Koreano nga nia sa ato nga abusado. Hinaot nga dili sab nato i-tolerate ang salawayon nilang buhat!

 (Sumbong ug reklamo? Text sa 0910-8105522).