Si Piskal Patrick Osorio

Nanagsubo ug nahibulong ang kadaghanan nga nakaila kang Piskal Patrick Osorio kun nganong nahimo siyang biktima sa kalit nga kamatayon pinaagi sa pag-ambush. Sa amo lang nahibaw-an kaniya, hilomon man siya nga pagka tawo ug dili man hambogero o palaaway. Nagpadayon pa hinuon ang imbestigasyon aron mahibaw-an ang kamatuoran nga nagpaluyo niini. Sa pagka-karon, igo nalang namong i-ampo sa labaw’ng Makagagahom nga dawaton kini sa iyang gingharian.

Bisan kun dili kami pareho og opisina ni Piskal Osorio, nahimo akong usa sa mikugos sa iyang anak sa bunyag niini. Panagsa ra hinuon mi magkita sa Kapitolyo sanglit managlagyo man ang among mga buhatan. Apan wala ako’y nadunggan nga gikasungi niini bisan kun ubay-ubay sad ang radyo-baba diri.

Dili lalim ang trabaho sa usa ka piskal ug daghang wala makasabot nga wala sa among mga kamot ang kadaugan o kapildihan sa kaso, bisan pa kun adunay mga tawo nga mamaligya sa ngalan sa piskal o huwes aron makakwarta. Igo lamang kaming modawat sa ebidensya ug mopresentar niini sa korte. Dili kami ang naghimo niini, ug labaw nga dili kami ang modesisyon sa kaso. Dili kami ang nangita sa buruka, ug wala kami labot sa panagbangi sa pikas-pikas nga habig. 

Sama sa Public Attorney’s Office, ang trabaho sa piskal mao nga matunhay ang kaso ug matigayon ang bista. Isip mag-alagad sa publiko, among gitampo ang among talento ug abilidad alang kanila. Gisweldohan kami sa gobiyerno aron moserbisyo sa katawhan. Sa ubos namo kaayo nga sweldo, kun ikomparar sa mga abogado nga anaa sa pribadong mga opisina ug mga naghupot og pareho-parehong katungdanan sa mga dagkong kompaniya, dagko kaayo ang trabahuon ug responsibilidad nga among giatubang. Daghan ang among gi-serbisyohan, ug kuti kaayo ang among gipangtun-an. Sa pagka-tinuod lang, ubay-ubay ang sakripisyo nga gihimo sa matag usa kanamo nga ania sa maong trabaho. Hinuon, dili kita makabasol kun adunay   uban nga masagmuyo sa pipila kanamo, kay aduna man usay mga higayon gud nga aduna usay magbinuang. Apan baya kun ikomparar ang Sugbu sa ubang dapit sa Pilipinas, mas daghan ang misalig sa sinsiridad sa atong mga huwes ug piskal dinhi sa ato.

Siguradong mingawon kami kang Piskal Osorio. Bisan siya hilomom, daghan ang nagpangga kaniya sa iyang mga kaubanan tungod sa iyang pagka-simple ug pagka-hingamigo.  

Sa gihapon, ang hustisya magpadayon ra gihapon bisan kun adunay mga sundalo niini nga nangapukan.

* * *

Alang sa inyong mga panahom, palihug email sa [email protected]. Dahang salamat.