Social user

Ambot unsay boot ipasabot sa usa sa mga ginikanan sa gitawag og Alabang Boys nga dili pusher ang iyang anak kun dili usa lamang kini ka social user. Unsa ba kining Social user nga iyang giingon? Ig-unsa man ni social cancer si social user? Maka-justify ba kini sa kasong giatubang sa iyang anak? Ah, para di mo maglibog ingnon ta na lang nga kining social user mao ni social nga termino sa mga adik-adik. Pero ingon ang PDEA nga ang Alabang Boys mga pushers ug dili lang ni mga users.

* * *

Nagkainit karon ang bangi tali sa Philippine Drug Enforcement Agency (PDEA) ug Department of Justice (DOJ) tungod sa gitawag og Alabang Boys. Ang Alabang Boys kinsa giingon nga mga anak og impluwensyadong tawo nadakpan sa operatiba sa PDEA ug gipasakaan og kaso apan ang kaso gibasora tungod kay wa kini lig-ong ebidensya. Tungod niini miangal ang PDEA ug namasangil ngadto sa DOJ nga nasubornohan sa mga akusado og minilyon hinungdan nga gibasora ang kaso bisan og lig-on ang ilang ebidensya niini.

Apan ang DOJ midason nga dili magamit ang mga ebidensya nga nahipos sa PDEA gikan sa mga akusado tungod kay nakuha kini nga wa sunda ang saktong proseso. Nagkasumpaki usab ang mga pamahayag sa mga operatiba sa ilang gipirmahan nga affidavit hinungdan nga lisod tuohan.

Matinuod man o dili ang isig kapasangil sa PDEA ug DOJ wa kini makatuis sa kamatuoran nga na “Black Eye” na usab ang kampanya sa kagamhanan batok sa ginadiling drugas.

* * *

Miresulta na ang bangi sa politika sa lungsod sa Tudela sa isla sa Camotes. Pipila na ka adlaw ang nakalabay lima ka mga panimalay sa Barangay Kalmante sa nahisgutang lungsod ang naugdaw sa sunog. Ang lungsod aduna untay fire truck ug usa ka bombero pero wa ni makatubag sa sunog tungod kay way ligid ug baterya ang fire truck. Ang bombero wa upod masayod kun si kinsa ang nagtago sa yawe niini. Si Baquerfo mipasangil ngadto sa mga tawo ni Demit Granada nga maoy mikawat sa ligid ug baterya sa fire truck ug mao usab ang mitago sa yawe. Pero ang kampo ni Granada misumbalik usab sa pag-ingon nga sa panahon pa ni Baquerfo nga wa nay mga ligid, baterya ug yawe ang ilang fire truck. Kun ako pay nasunogan gipakong ko na seguro ang ulo ning Baquerfo ug Granada.