Daghan ang nagpadangat og reklamo ngari nako pinaagi sa text bahin sa pusher diha sa Tambisan. Ang labing ulahi mao ang naggamit sa cell. no. 0905-7298518 (Sent: 06:02:04 pm--Sept. 2, 2008)
Sumala sa iyang text, bigtime na ang pusher nga nag-operate diha sa Tambisan. Giila sa atong texter ang pusher sa ngalan nga Jongjong. Identified na kuno kaayong pusher kining tawhana diha sa Tambisan.
Matud sa atong tipster, shabu ang gipayuhot sa pusher nga si Jongjong. Gawas sa pagpayuhot og shabu, may armas pa gayod kunong gihuptan kining tawhana.
Angayan ning susihon sa atong mga awtoridad. Mas maayong ilang ma-counter check kining gitaho sa atong tipster aron masuta kun tinuod ba gayod nga nalambigit sa illegal activities kini si Jongjong. Angay sab tinuon kun lisensiyado ba ang armas nga iyang gihuptan.
Aksiyoni!
* * *
Ang atong texter nga naggamit sa cell. no. 0915-3798374 mi-text nako nga nagkanayon:
"Good day, Sir. Palihog kuno ko’g patik ning akong text sa imong lindog. Kini bang tambok nga tawo diri sa north bus terminal, wa gyo’y nakabadlong. Nagsige ni siyag panguwarta sa mga V-hire. Kada larga P100 gyod ang pangayoon. Lain pa ang bayranan sa ticket. Wa gyod na mabadlong sa tagdumala sa terminal. Hinaot nga maaksiyonan dayon ni." -- (Sent: 12:43:452 am--September 3, 2008)
Unsa may ranggo o posisyon nianang maong "tambok" diha sa North Bus Terminal? Alang sa unsa man kanang iyang kolektahon gikan sa mga V-hire? Legal ba kanang iyang gibuhat? Moisyu ba siyag resibo sa iyang pagpahigayon og pangoleksiyon? Nganong gipasagdan man siya kun ugaling dili legal ang iyang gibuhat?
Kini ang mga pangutana nga atong ipatubag sa tagdumala sa North Bus Terminal aron dili na magbagulbol ang mga driver og V-hire. Bukas kining lindog alang sa pamahayag sa NBT management. Salamat.
* * *
(Sumbong ug reklamo? Text sa 0910-8105522).