Kusog mopatak

"Sir, good PM. Maayo unta nga masumpo kining mga taxi nga grabe kakusog mopatak ang meter. Karon pa lang gyod, bag-o ko nanaog gikan sa taxi nga akong gisakyan. Ang patak niabot og P192.50. Sige na mig sakay gikan CCMC padulong diri sa Mandaue, sa may Norkis. Ang among sagad mabayran P70 plus ra man. Usahay moabot P80 plus pero di na mosobra pa ana. Pero karon niabot man og P192.50. Mao pay gikan ko sa ospital kay nagpa-check up sa operasyon nako gipahimuslan pa gyod ko." -- 0906-7658187 (Sent: 03:34:52pm--January 21, 2008)

Kombinsedo ko sa imong gisulti nga kusog gyod mopatak ang meter sa taxi nga imong nasakyan nga nakaabot og P192.50 ang imong nabayran. Ako mismo nakasakay na og taxi nga lapas pa sa gilay-on sa imong destinasyon pero P70 plus ra man ang akong nabayran. Tikasan gyod tong metrohan sa taxi nga imong nasakyan nga dako kaayo ang imong nabayran. Tul-id og tinai ang nag-calibrate niadto.

Kun makasugat mog sitwasyon nga ingon niini, ayaw ninyo palabya ang higayon. Himoi gyod ninyog aksiyon. Mas maayo nga kamo mismo ang mangunay sa pagpadangat og reklamo ngadto sa buhatan sa transportation sama sa LTO ug LTFRB aron mahatagan gilayon og dinalian nga aksiyon ug masanta na ang mga badlongon. Kuhaa ang plate number sa taxi, ngalan sa taxi ug ngalan sa driver aron sayon subayon sa mga awtoridad.

* * *

"Good AM, Sir. Ako lang untang balikon ang imong gihisgotan bahin sa karsada dapit sa St. Dominic nga labihan na gyod kakuyaw sa maong dalan. Dagko na kaayo ang nanggataw nga mga bato. Hatagan na unta nag pagtagad sa lokal nga kagamhanan samtang wa pay nadisgrasya nga nahitabo." - 0928-4270393 (Sent: 09:04:00am--January 20, 2008)

Manghinaot ta nga mahatagan nag pagtagad kining maong problema ug matarong na kanang karsada diha sa St. Dominic dapit. Atong hagiton ang mga opisyal sa lokal nga kagamhanan sa pag-atender niining maong problema. Ila man gyod nga katungdanan ang pagserbisyo sa ilang mga kakonstituwente maong mamarayeg na lang ta nila sa pagsulbad sa suliran sa karsada sa ilang lugar.

* * *

 (Sumbong ug reklamo? Text sa 0910-8105522).