Karsada

"Good PM, Sir. Dugay na gyod ming nag-antos ining karsada gikan sa Malalay road hangtod sa Butong padulong sa Ilaya diri sa lungsod sa Ronda. Kapila na gyod mi nalangan sa oras sa among trabaho gumikan ining mga dalan nga puwerte na gyong gubaa. Kanus-a pa man kaha ni matagad? Hinaot unta nga madungog ni sa mga anaa sa puwesto aron mahatagan nig solusyon. Giayo man unta ni sa DPWH sa una pero gibiyaan kay wa na daw budget. Asa man diay napunta ang budget ini?" -- 0909-6219491 (Sent: 01:48:12 pm--October 18, 2008)

Manghinaot ta nga inigkapatik ning imong text, higalang texter, nasulbad na ang kabati sa dalan diha sa Malalay road paingon sa Butong nga maoy imong gireklamo.

Pero kun wala pa gihapon matrabaho ang gubaong karsada diha, hinaot unta nga matagad na kini sa nahingtungdang mga buhatan sa gobiyerno.

* * *

"Good day, Sir Orie. Nangaplay ko'g trabaho sa usa ka kantonan sa Kansohong, Talisay unya nadawat ko. May gipirmahan kong kontrata baleg 6 month. Ang schedule 6AM to 6PM ang trabaho. Pero mahuman mi ala una sa kaadlawon. Walay bayad among overtime. Ang inadlaw rang P210 ang akong madawat." -- 0909-6688620 (Sent: 03:05:55pm--October 19, 2008)

Ang nalatid sa balaod mao nga walo ka oras lang ang regular nga gidugayon sa pagtrabaho. Kanang inyong schedule nga 6AM to 6PM dili na kana regular. Angay kang modawat og overtime pay sukad sa alas 2 sa palis hangtod sa ala una sa kaadlawon.

Grabe na man sab ka walay balatian kanang inyong employer. Sobra na man kaayo ang iyang pagpahimulos sa inyong kusog. Kun siya kahay patrabahoon sukad sa alas 6 sa buntag hangtod sa ala una sa kaadlawon, makalahutay kaha siya?

Puyde kang modangop sa DOLE aron ireklamo ang imong employer. Ug kun dili ka gustog samok, motambag na lang ko nimo nga kun mahimo, pangitag laing trabaho. Kanang dili ingon niana kamadaugdaogon ang imong amo!

(Sumbong ug reklamo? Text sa 0910-8105522).