Pagarpar lang ta kutob

Daan pa ko, dili g’yod masulbad ug dili masumpo ang mga bata nga maglibudsuroy ug anha mangayo’g pinaskohan sa mga motorista nga mohunong sa mga dagkong eskena.

Bisan pa sa gipasiatab sa City Hall nga panghiposon nila kining maong mga bata, daghang bata nga makita nimo sa mga eskena mao nga nakaingon ko nga kutob ra g’yod ta sa propaganda.

Matag gabii nga moagi ko sa eskena Gorordo Avenue ug Echavez, dayon Escario ug Gorordo, sa General Maxilom ug MJ Cuenco Avenue, sa P del Rosario, didto dapit sa SM City, tapuk-an sa mga bata ang mga sakyanan.

Malooy man g’yod unta ta kay pila ra man god ang sensiyo nga ihatag kanila, apan ang paghatag kanila niini makapasamot lang sa ilang kaikag nga magsigi’g pangayo sa mga motorista.

Kuyaw pa gani nga iniglarga nimo, mabag-iran ang mga bata sa sakyanan. Kun mahitabo kini, maproblema ang mga makadam-ag.

Bi, kamo sa City Hall unsay inyong ikasulti? Kun manghambog kamo ug moingon nga hingpit ninyong mahipos ang mga bata ug apil ang mga hamtong nga magsigi’g pamasko ug magpakilimos sa karsada, moagik-ik gyod ko’g katawa.

* * *

Magpasalamat na g’yod ta kay padayong mikunhod ang presyo sa fuel products ingon man sa LPG.

Ang matag litro sa diesel nga maoy gigamit sa akong sakyanan, tag P33.76 na lang tawon kun itandi kaniadto nga miabot g’yod og P61.76.

Ang LPG kaniadto miabot og P716.00 ang 14 kilos, karon mius-os tawon sa P471.

Dili ba maayo nga ang botelya sa beer kunhoran usab ngadto sa P13 na lang ang botelya? He hehehe.

Apan ang presyo sa bugas mahal-mahal pa man gihapon. Wa pa man mokunhod. Dili ba maayo nga iapil kini sa pagkunhod?

Ang pletehan kinahanglan usab unta nga himoon na lang P6 ang minimum. Awhagon nato ang mga transport operators nga unta ila kining himoon.

Daku na god kaayo ang pagkunhod sa presyo sa fuel ug angay na nga paminosan nila ang pletehan. Ang kadagkoan sa LTFRB angay’ng mohimo na niining maong lakang.

Unsaon nga duna man koy nadunggan nga mao kuno nga magdiki-diki ang LTFRB sa pagpaminus sa pletehan sa mga PUJ kay duna man diay mga LTFRB officials nga operators usab og jeepney.

Conflict of interest kini kun imong huna-hunaon. Angay nga susihon kini ni Atty. Manuel Iway, nga maoy sagad mangulo sa mga lakang nga pabor sa katawhan.

Kun tinuod ang report nga akong nadawat, dili kini maayo. Makaingon kita nga mao diay nga magpadugay-dugay ang LTFRB sa paghatag og roll back kay apektado man ang ilang mga kauban.

* * *

Akong pasalamat sa kadagkoan sa Chow King diha sa E-mall kay dili g’yod diay mawala ang butang nga mahabilin sa ilang balay-patigayon.

Ingon niana ang maayong modumala og patigayon nga kun dunay mahabilin, dili g’yod mawala.

Kadto go’ng away nila ni Pacquiao ug Dela Hoya giimbitar ko ni Konsehal Bebot Abellanosa nga adto patan-awon sa iyang pay-per view sa bag-o niyang building.

Human sa fight, mihapit ko sa Chow King, apan nahabilin ang akong paborito nga coat. Salamat kay ilang gitipigan hangtud karon.

* * *

Kun duna mo’y komentaryo sa mga isyu nga atong gihisgutan, ayaw kataha sa pagpadangat niini nako. Ako kining tagdon. Ipadala lang sa akong e-mail ang [email protected]